الماتىدا 29 ادامدى ۇرلاپ، ولارعا 200 ميلليون تەڭگە نەسيە الدىرعانى انىقتالدى، دەپ حابارلايدى Alash.kz.
بۇل تۋرالى Polisia.kz ءوز پورتالىندا مالىمدەدى.
الماتى قالاسىندا ۇيىمداسقان قىلمىسقا قارسى كۇرەس باسقارماسىنىڭ جەدەل ۋاكىلدەرى بەلگىلى ءبىر تۇرعىلىقتى جەرى جوق ادامداردى ۇرلاۋمەن جانە زاڭسىز باس بوستاندىعىنان ايىرۋمەن اينالىسقان قىلمىستىق توپتىڭ قىزمەتىن توقتاتقان.
– سوتقا دەيىنگى تەرگەپ-تەكسەرۋ ناتيجەسى مەن جيناقتالعان دالەلدەمەلەر جيىنتىعى بويىنشا كۇدىكتىلەرگە قاتىستى ۇيىمداسقان قىلمىستىق توپ قۇرعانى، ونى باسقارىپ، قاتىسقانى ءۇشىن ەكى قىلمىستىق ءىس قوزعالدى. قىلمىستىق توپتىڭ بارلىق جەتى مۇشەسى ۇستالىپ، قاماققا الىندى. زاتتاي دالەلدەمەلەر تاركىلەنىپ، تەرگەۋ امالدارى جۇرگىزىلۋدە. باسقا دا اقپارات تەرگەۋ مۇددەسىندە جاريالانۋعا جاتپايدى، – دەدى دەپارتامەنت باستىعى – ءىىم رەسمي وكىلى شىڭعىس الەكەشيەۆ.
كۇدىكتىلەر جابىرلەنۋشىلەردى الداپ، ولارعا قايتارىمسىز نەسيە راسىمدەتكەن. ارنايى جالعا الىنعان كوتتەدجدە قاماۋدا ۇستالعان 29 ادام انىقتالدى. ولارعا كەلتىرىلگەن شىعىن 200 ملن تەڭگەدەن اسادى.
