ءماجىلىس دەپۋتاتى رينات زايىتوۆ استاناداعى ساپاسىز ۇيلەر مەن تۇرعىنداردىڭ جانايقايىن جەتكىزدى. ونىڭ ايتۋىنشا، تۇرعىن ءۇي سالاسىندا زاڭسىزدىقتار كوپ. ءتىپتى بۇل تۇرعىدان حالىقتىڭ ءۇنى ءتيىستى جەرگە جەتپەي قالادى.
«ۇلەسكەرلەردىڭ ءوز باسپاناسىنان ايىرىلىپ قالۋىنان باستاپ، ەلوردادا اپتا سايىن بوي كوتەرەتىن تۇرعىن ءۇي كەشەندەرىنىڭ سىن كوتەرمەس ساپاسىنا دەيىن پروبلەما كوپ. مىسالى، «ازيا پليۋس» تۇرعىن ءۇي كەشەنىندە تۇرعىندار، ياعني قاريالار، كىشكەنە بالالارمەن جۇكتى انالار، سونداي-اق مۇگەدەكتىگى بار تۇلعالار ءوز ۇيلەرىنە كىرەتىن ەسىگىنىڭ، نە كىرەبەرىسىنىڭ بولماۋىنا بايلانىستى، كۇندەلىكتى پاركينگ ارقىلى كىرۋگە ءماجبۇر. سونىڭ سالدارىنان ءبىر بالانى كولىك قاعىپ، كۇنى كەشە عانا 16 ناۋرىزدا ەكى جەتكىنشەك ارسىز پەدوفيلدىڭ قولىنا تۇسە جازداعان فاكتىلەرى انىقتالعان»، - دەدى دەپۋتات.
ونىڭ سوزىنشە، تۇرعىندار الاياقتىق فاكتىسى بويىنشا ارىز جازسا دا ءىس قوزعالماعان.
«ونىمەن بۇل ماسەلە بىتكەن جوق، بۇل ءۇيدى تۇرعىندارعا ساتار كەزدە «بيزنەس» ساناتىنداعى ءۇي دەپ ساتىپ، بىرەر جىل وتكەن سوڭ پايدالانۋعا قابىلداۋ كەزىندە «ەكونوم» ساناتىنا اۋىستىرا سالۋلارى دا مۇمكىن ەكەن. سونىمەن قاتار «ۋسپەشنىي دوم» تۇرعىن ءۇي كەشەنىنىڭ تۇرعىندارى دا الاياقتىق ءىس ارەكەتتەرگە ۇشىراپ وتىر. ماسەلەنىڭ ءمان-جايىن انىقتاماق ويمەن ءبىر ەمەس بىرنەشە ارەكەت جاساپ كوردىك. حالىقتى ويلاپ جاتقان بىردە-بىر قۇزىرەتتى ورگان كورمەدىك. تۇرعىندار الاياقتىق فاكتىسى بويىنشا ارىز جازسا دا ءىس قوزعالماعان. حالىقتىڭ پايداسىنا شەشىلگەن سوت شەشىمى ورىندالماعان. وسىنداي دا ءبىزدىڭ زاڭدار قاراپايىم حالىقتىڭ مۇددەسىن قورعاۋعا كەلگەندە نەگە قاۋقارسىز بولا قالادى؟ قاشقاقتاپ قاعاز شىعىنداي بەرگەنشە ىسكە كوشىڭىزدەر، مىرزالار!»، - دەدى رينات زايىتوۆ.
ءسوزىنىڭ سوڭىندا، ءماجىلىس دەپۋتاتى استانا قالاسى اكىمدىگى جانە قۇرىلىس سالاسىنداعى ولارعا قاراستى باسقارمالار قىزمەتكەرلەرىنە كەشەندى تەكسەرۋ جۇرگىزۋدى، ساۋلەت جانە قالا قۇرىلىسى سالاسىنداعى مەملەكەتتىك باقىلاۋدى كۇشەيتۋدى ۇسىندى.
سونىمەن قاتار قۇجاتتارعا زاڭسىز قول قويىپ، لاۋازىمىن پايدالانىپ، زاڭدى بۇزعان قىزمەتكەرلەرگە شارا قولدانۋىڭىزدى سۇرايتىنىن جەتكىزدى.
