بالالارعا ارنالعان تەلەارنا – Balapan-دى وسى ۋاقىتقا دەيىن بىرنەشە ادام باسقاردى. ءبىر قىزىعى، ولاردىڭ ءبارى ايەلدەر ەكەن. وسى ورايدا بەلگىلى تەلەجۋرناليست دانيار ەسەن ءوزىنىڭ facebook-پاراقشاسىندا تەلەارنا باسشىلىعىنا ءوزىن ۇسىنىپ جاتىر، دەپ جازادى Alash.kz.
«بالاپان» ارناسىن وسى ۋاقىتقا دەيىن تەك حاتۋن-قىزلار باسقارىپتى: جانار شامەل، ءلايلا سۇلتان قىزى، ماقپال جۇماباي، قىمبات دوسجان، ينديرا تۇرسىنباي. ارينە، ءارقايسىسىنىڭ ءوز ورنى بار دەپ جازدى،Ulysmedia.kz.
ءبىراق نەگە ەلىمىزدەگى جالعىز بالالار ارناسىن تەك ايەلدەر باسقارعان؟ سوندا ەر ازاماتتاردىڭ بالا تاربيەسىنە قاتىسى جوق پا؟ ونسىز دا ءبىلىم سالاسىندا - ايەلدەر، بالا جۇرگەن جەردىڭ بارىندە - ايەل.
بالا تاربيەسىنە جاۋاپتى بولىپ، وتباسىن سۇتتەي ۇيىتىپ وتىرعان قانشاما اكە، ەركەك بار. بالا تاربيەسىنە تەك ايەل عانا ەمەس، اكە دە جاۋاپتى، - دەيدى دانيار ەسەن.
وسى ورايدا، تەلەجۋرناليست «ناعىز تاۋ قوپاراتىن جاستا» ەكەنىن، Balapan تەلەارناسىن باسقارۋعا ءبىلىمى مەن قابىلەتى جەتەتىنىن ايتتى.
بالالار مەن جاسوسپىرىمدەر تاقىرىبىندا جازىپ جۇرگەنىمە جەتى جىلدان استى. بۇل تۋرالى ينستاگرامداعى وقىرماندارىم جاقسى بىلەدى. ءتىپتى، بىرەۋلەر ماعان «قازاقتىڭ شالۆا ءاماناشۆيليى» دەپ ات قويىپ الىپتى.
ماقتانعانىم ەمەس، بالا تاربيەسىنە اتسالىسىپ جۇرگەن از عانا اكەنىڭ ءبىرىمىن. «اكەلەر وداعى» ءتوراعاسىنىڭ ورىنباسارى بولدىم. بالانىڭ ءتىلىن مەن سياقتى تۇسىنەتىن اكە از.
«بالاپان» تەلەارناسىن باسقارۋعا مەنىڭ قابىلەتىم دە، ءبىلىمىم دە جەتەدى.
«قازاقستان» تەلەراديوكورپوراسياسىنا بوتەن ەمەسپىن. 20 جىلىم وسى كورپوراسيادا ءوتتى.
وسى ۋاقىتقا دەيىن باسشىلىق قىزمەتتەرگە مەنىڭ كانديداتۋرام قارالعاندا، «دانياردىڭ مىنەزى جۇمساق» دەپ ايتادى ەكەن. ماسەلە جۇمساقتىقتا ەمەس، بىلىكتىلىكتە دەپ بىلەمىن. ونىڭ ۇستىنە، اگرەسسيا قاپتاعان ءبىزدىڭ قوعامدا جەتىسپەي تۇرعانى - سول گۋمانيزم مەن كاسىبيلىك ەمەس پە؟
يدەيا كوپ. ناعىز تاۋ قوپاراتىن جاستامىن. كەرەمەت كونتەنت ۇسىنار ەدىم، - دەدى د. ەسەن.
