زاڭ جوباسىنا سايكەس، "سايلاۋ تۋرالى زاڭنىڭ" 3-بابى ("سايلاۋ قۇقىعىنىڭ پرينسيپتەرى") "سايلاۋعا دايىندىق كەزىندە جانە وتكىزگەن كەزدە سىرتتان ارالاسۋعا جول بەرىلمەيدى" دەگەن 3-1 پۋنكتىمەن تولىقتىرىلماق.
20-باپتىڭ ("سايلاۋ كوميسسياسىنىڭ قىزمەتىن ۇيىمداستىرۋ جانە ولاردىڭ ارەكەتىنە شاعىمدانۋ. سايلاۋ كوميسسيالارىنىڭ اشىقتىعى") 8-پۋنكتەگى "ءاربىر [اقپارات قۇرالىنان] ءبىر وكىل" دەگەن تىركەس "ءاربىر اقپارات قۇرالىنان ءۇش وكىلدەن ارتىق ەمەس" دەگەن تىركەسپەن الماستىرىلادى. بۇعان قوسا، "قوعامدىق بىرلەستىك، وزگە كوممەرسيالىق ەمەس ۇيىمدار" دەگەن تىركەس "اككرەديتاسيادان وتكەن قوعامدىق ۇيىم، كوممەرسيالىق ەمەس ۇيىم" دەگەن تىركەسپەن الماستىرىلادى.
وسىعان دەيىن 20-1 باپ "ساياسي پارتيالار، وزگە دە قوعامدىق بىرلەستىكتەر، كوممەرسيالىق ەمەس ۇيىم باقىلاۋشىلارى" دەپ اتالىپ كەلسە، ەندى وزگەرىستەردەن كەيىن ول تىركەسكە "اككرەديتاسيادان وتكەن" دەگەن ءسوز قوسىلادى.
سايلاۋلاردى تاۋەلسىز باقىلاپ جۇرگەن "ەركىندىك قاناتى" قوعامدىق قورىنىڭ جەتەكشىسى ەلەنا شۆەسوۆانىڭ ايتۋىنشا، زاڭ جوباسىنان بۇرىن ادىلەت مينيسترلىگى ايتقان "شەتەلدەن قارجىلاندىرۋ" تۋرالى پۋنكت كورىنبەيدى. ءبىراق باقىلاۋشىلاردى اككرەديتاسيادان وتكىزۋ تۋرالى پۋنكت جاقسى نورما ەمەس.
— ولار شەتەلدەن قارجى الۋ دەگەن پۋنكتى الىپ تاستاعانمەن باقىلاۋشىلاردى اككرەديتاسيادان وتكىزۋ تۋرالى پۋنكتىنى قالدىرعان. بۇل جاقسى نورما ەمەس. وسك كىمگە سايلاۋدى باقىلاۋ مۇمكىندىگىن بەرىپ، كىمگە بەرمەۋ كەرەكتىگىن ءوزى شەشەدى. تاعى ءبىر بۇلىڭعىر پۋنكت - "سايلاۋعا دايىندىق كەزىندە جانە وتكىزۋ كەزىندە شەتەلدەن ارالاسۋعا جول بەرمەۋ" دەگەن پۋنكت. ونىڭ باقىلاۋشىلارعا قاتىسى بار ما، جوق پا، بەلگىسىز. ءبىراق ول جەردە "باقىلاۋ" دەگەن ءسوز جوق، سول سەبەپتى ونىڭ بىزگە قاتىسى جوق سياقتى، – دەيدى ەلەنا شۆەسوۆا.
شىلدە ايىندا ادىلەت مينيسترلىگى اتالعان زاڭ جوباسىن قوعام تالقىسىنا شىعارعان. زاڭ جوباسى بويىنشا، سايلاۋدى ورتالىق سايلاۋ كوميسسياسىنىڭ (وسك) اككرەديتاسياسىنان وتكەن ۇيىمدار عانا باقىلاي الادى. اتالعان تۇزەتۋگە قارسى كامپانيا باستاعان بەلسەندىلەر مەن قۇقىق قورعاۋشىلار تاۋەلسىز باقىلاۋشىلار سايلاۋ ناۋقاندارىنان شەتتەتىلۋى مۇمكىن دەپ قاۋىپتەنگەن. بۇعان قوسا، جاڭا تۇزەتۋلەرگە سايكەس، وسك-نىڭ اككرەديتاسياسىن كەيىنگى ءبىر جىلدا شەتەلدەن قارجى الماعان ۇكىمەتتىك ەمەس ۇيىمدار عانا وتە الادى. ادىلەت مينيسترلىگى مۇنى "زاڭنامادا بار نورمالاردى ناقتىلاۋ" دەپ تۇسىندىرگەن.
كەيبىر ساراپشىلار زاڭ جوباسى سول كۇيىندە قابىلدانسا، ەلدە "تاۋەلسىز باقىلاۋ تۇتاس جويىلادى" دەپ مالىمدەگەن. ۇكىمەتتىك ەمەس ۇيىمدار ورتاق مالىمدەمەسىندە زاڭ جوباسىندا قوعام ۇيىمدارى مەن كوممەرسيالىق ەمەس ۇيىمداردىڭ قۇقىقتارىن شەكتەپ، الالايتىن باپتار بار دەپ سىناعان.
بۇعان دەيىن قوعام بەلسەندىلەرى دە اتالعان وزگەرتۋلەرگە قارسى شىققان. 24 شىلدەدە بەلسەندى دانيار سۋپييەۆ وسى تۇزەتۋلەرگە قارسى پيكەت وتكىزىپ، سوت "بەيبىت جيىن وتكىزۋ ءتارتىبىن بۇزعانى ءۇشىن" بەلسەندىگە 150 مىڭ تەڭگە كولەمىندە ايىپپۇل سالعان.
