ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ءداۋىردىڭ" داۋرەنى نەگە ءجۇرىپ تۇر؟ سۆەتلانا نازاربايەۆانىڭ باسپاسى جىلىنا قانشا ملرد تەڭگە تاپسىرىس الادى؟

26 تامىز 2022 77
سۆەتلانا نازاربايەۆعا تيەسىلى «ءداۋىر» پوليگرافيالىق باسپا كەشەنى مەملەكەتتىك ساتىپ الۋ بويىنشا تاپسىرىس الۋدى جالعاستىرىپ كەلەدى، دەپ حابارلايدى Halyq Uni.

قازاقستانداعى باسپالار اراسىندا مونوپوليسكە اينالعان «ءداۋىر» باسپاسى قاماۋداعى قايرات ساتىبالدىنىڭ اناسى سۆەتلانا نازاربايەۆاعا تيەسىلى.

مەملەكەتتىك ساتىپ الۋ پورتالىنداعى اقپاراتقا سۇيەنسەك، باسپا اقپاننان بەرى ءبىر كوزدەن ساتىپ الۋ ءادىسى ارقىلى بىرنەشە تاپسىرىس الىپ كەلەدى.

ماسەلەن، بيىل اقپاندا «Alatau Akparat» ج ش س-مەن جالپى قۇنى 12 ملن تەڭگەدەن اساتىن ەكى كەلىسىمشارت جاساسقان.

ەكس-پرەزيدەنتتىڭ نەمەرە ءىنىسى قايرات ساتىبالدى ۇستالدى دەگەن اقپارات ب ا ق بەتتەرىندە تۋرا ءبىر ايدان سوڭ 13 ناۋرىز كۇنى جاريا بولدى. ول «قازاقتەلەكوم» اق قوماقتى قارجىسىن جىمقىردى جانە قىزمەتتىك وكىلەتىن اسىرا پايدالاندى دەگەن كۇدىككە ىلىنگەن. تەرگەۋ 24 تامىز كۇنى اياقتالدى.

اناسى سۆەتلانا نازاربايەۆاعا تيەسىلى «ءداۋىر» باسپاسى قايرات ساتىبالدى تەرگەۋدە جاتقان كەزدە دە، ياعني ناۋرىزدىڭ 31ء-ى كۇنى قۇنى 61 ملن تەڭگە بولاتىن تاعى ءبىر تاپسىرىس العان.

تاپسىرىس بەرۋشى – «Alatau Akparat» ج ش س. ءدال وسى كومپانيامەن 5 مامىر كۇنى كەلىسىمشارتتى تاعى جالعاستىرعان. بۇل كەلىسىمشارت قۇنى – 53 ملن تەڭگەگە جۋىق.

تەحنيكالىق سيپاتتاماسىندا باسپانىڭ «ۆەچەرنيي الماتى» جانە «الماتى اقشامى» گازەتتەرىن باسىپ شىعارۋ ءۇشىن گازەت قاعازىن جەتكىزۋگە جانە قويمادان الماتىدا ورنالاسقان باسپاحاناعا جەتكىزۋ كەرەك دەپ كورسەتىلگەن.

«ءداۋىر» باسپاسى ماۋسىم ايىندا مادەنيەت جانە سپورت مينيسترلىگىنىڭ تاپسىرىسىمەن تاعى بىرنەشە لوتتىڭ جەڭىمپازى اتانعان.

قوعامدىق ماڭىزى بار ادەبيەتتى باسىپ شىعارۋ جانە تاراتۋ بويىنشا قىزمەت كورسەتۋگە جاسالعان ءۇش كەلىسىمشارتتىڭ جالپى قۇنى – 48 ملن 810 مىڭ تەڭگە بولادى.

تەحسيپاتتاماسىندا كورسەتىلگەندەي، باسپا بارلىعى 8 قالامگەردىڭ كىتابىن باسىپ شىعارۋ جانە كىتاپحانالارعا تاراتۋ قىزمەتىن ىسكە اسىرادى.

ال شىلدە ايىندا باسپا مەن مينيسترلىك تاعى بىرنەشە تاپسىرىستى ورىنداۋعا كەلىسىمشارت قۇرعان. 4 كەلىسىمشارتتىڭ جالپى قۇنى – 111 ملن تەڭگەدەن اسادى.

مۇندا دا قوعامدىق ماڭىزى بار ادەبيەتتى باسىپ شىعارۋ جانە تاراتۋ بويىنشا بارلىعى 33 قالامگەردىڭ كىتابىن باسىپ شىعارادى.

وسىلايشا قايرات ساتىبالدىنىڭ ءوزى قاماۋدا وتىرعانىمەن، وتباسىنىڭ ءجۇرىپ-تۇرۋىنا كەتەتىن شىعىنىن مەملەكەتتىك تاپسىرىستار ارقىلى ءوندىرىپ وتىرعان.

Forbes جۋرنالى 2018 جىلى قايرات ساتىبالدىنى قازاقستانداعى ەڭ ىقپالدى 50 كاسىپكەردىڭ قاتارىنا جاتقىزعان. جۋرنال سول جىلى ونىڭ بايلىعىن 163 ملن دوللارعا باعالاعان. بۇگىندە تەرگەۋ بارىسىندا جالپى سوماسى 240 ميلليارد تەڭگەدەن نەمەسە 500 ميلليون اقش دوللارىنان اساتىن زاڭسىز ساتىپ الىنعان اكتيۆتەرى مەن اقشاسى مەملەكەتكە قايتارىلدى.

سىبايلاس جەمقورلىققا قارسى قىزمەت ايىپتالۋشىلاردىڭ باسقا دا زاڭسىز اكتيۆتەرىن ىزدەۋ جالعاسىپ جاتقانىن مالىمدەدى.

ايتا كەتەلىك، 2003 جىلى قۇرىلعان «ءداۋىر سەرۆيس» جشس-نا دا سۆەتلانا نازاربايەۆا يەلىك ەتەدى. بۇل كومپانيا دا ەلدەگى ەڭ ءىرى گازەت – «ەگەمەن قازاقستان» رەسپۋبليكالىق گازەتى» ج ش س-دان جىل سايىن ميللياردتاپ تەندەر الىپ كەلەدى.

تاراپتار اراسىنداعى سوڭعى كەلىسىمشارت بيىل ناۋرىزدا جاسالدى. قۇنى – 1 ملرد 107 ملن تەڭگە. كەلىسىمشارتتىڭ تەحنيكالىق سيپاتتاماسىنا قاراعاندا، «ءداۋىر سەرۆيس» ج ش س ءبىر جىل بويى قازاقستاننىڭ 12 قالاسىنا گازەت قاعازىن جەتكىزىپ بەرىپ وتىرۋعا ءتيىس.

Halyq Uni ەسەبىنشە، بيىلدىڭ وزىندە قاڭتار-تامىز ارالىعىندا سۆەتلانا نازاربايەۆاعا قاراستى قوس كومپانيا جالپى قۇنى 1 392 810 000 تەڭگەنىڭ مەملەكەتتىك تاپسىرىسىن العان.
بۇل ماقالا تۋرالى نە ويلايسىز؟