نۇرداۋلەتوۆتىڭ ايتۋىنشا، "زاڭسىز تەرگەۋ ادىستەرى" بويىنشا تۇسكەن 62 شاعىم راستالماعان. ازاپتاۋ جانە بيلىك وكىلەتىن اسىرا پايدالانۋ فاكتىلەرى بويىنشا 170 قىلمىستىق ءىس قوزعالعان. قالعان 73 شاعىمعا قاتىستى اقوردا حابارلاماسىندا ەشتەڭە ايتىلماعان.
"ءاربىر جاعدايدى مۇقيات قارايمىز، بۇلتارتپاس دالەل بار بولعان جاعدايدا عانا جاۋاپقا تارتامىز" دەپ اقوردا سايتى باس پروكۋروردىڭ سوزىنەن ءۇزىندى كەلتىرەدى.
قازاقستانا قاڭتار وقيعاسى كەزىندە جانە ودان كەيىن مىڭداعان ادام ۇستالىپ، جۇزدەگەن ادام "تەرروريزم"، "جاپپاي تارتىپسىزدىك"، "قارۋ-جاراقتى ۇرلاۋ" جانە وزگە قىلمىس جاسادى دەگەن كۇدىكپەن قاماۋعا الىنعان. ۇستالعانداردىڭ كوبىنىڭ تۋىستارى قاماۋ كەزىندەگى ازاپتاۋلارعا شاعىمداندى: ولاردىڭ سوزىنە قاراعاندا، پوليسيا بولىمشەلەرىندە جاقىندارىنىڭ ۇستىنەن ىستىق سۋ قۇيىپ، ۇتىكپەن جانە ەلەكتروشوكەرمەن كۇيدىرگەن، قاتتى ۇرىپ-سوققان.
قازاقستاندا ازاپتاۋلار تۋرالى ىستەر سوتقا سيرەك جەتەدى جانە كوپ جاعدايدا ايىپتاۋ ۇكىمى شىعا بەرمەيدى. مۇنداي ىستەر ادەتتە "قىلمىس قۇرامى جوق بولعاندىقتان" جابىلادى.
نۇرداۋلەتوۆتىڭ ايتۋىنشا، ارنايى پروكۋرورلار جەتەكشىلىگىمەن ۆەدومستۆوارالىق تەرگەۋ توبىندا "جاپپاي تارتىپسىزدىك جانە تەرروريزم اكتىسى" بويىنشا 177 ءىس بار. 779 ادام قاماۋدا وتىر.
"ازاماتتاردىڭ جەكە باس مالىمەتتەرى، دەنساۋلىعى مەن وزگە دە ماتەريالدار انىقتالعاننان كەيىن 109 ادامنىڭ قاماۋ شاراسى ەشقايدا كەتپەۋ جانە جەكە كەپىلدىك بەرۋ تۋرالى قولحاتتارمەن الماستىرىلدى. پروكۋرورلار تارتىپسىزدىككە قاتىسى بارى دالەلدەنبەگەن 103 ادامدى بوساتتى" دەدى نۇرداۋلەتوۆ.
- قاڭتار ايىنىڭ باسىندا ماڭعىستاۋ وبلىسىندا باستالعان نارازىلىق ەلدىڭ وزگە وڭىرلەرىنە جىلدام جايىلدى. كەيبىر وڭىردە تارتىپسىزدىكتەر بولدى. رەسمي مالىمەت بويىنشا، قاڭتار وقيعاسى كەزىندە كەمىندە 227 ادام قازا بولدى. بيلىك قازا بولعانداردىڭ ءتىزىمىن جاريالامادى.
- ازاماتتىق بەلسەندىلەردىڭ ايتۋىنشا، قازا بولعاندار اراسىندا بەيبىت ازاماتتار كوپ.
- 6 قاڭتارعا قاراعان ءتۇنى قاۋىپسىزدىك كەڭەسىنىڭ شۇعىل وتىرىسىندا پرەزيدەنت قاسىم-جومارت توقايەۆ العاش رەت "تەرروريست" ءسوزىن قولداندى. ول قازاقستانعا "ءىس جۇزىندە حالىقارالىق تەرروريستىك توپ" شابۋىل جاسادى دەپ مالىمدەدى. ول بۇل تىركەستى ۇقشۇ-دان "اسكەري كومەك" سۇراۋ ءۇشىن جانە كۇشتىك قۇرىلىمدارعا "ارنايى وپەراسيا" كەزىندە "ەسكەرتۋسىز وق اتۋعا" بۇيرىق بەرۋ ءۇشىن پايدالاندى. بيلىك "سىرتتان اگرەسسيا بولعانى" تۋرالى تۇجىرىمىنا ءالى كۇنگە دەيىن دالەل كەلتىرمەدى.
- جەرگىلىكتى جانە حالىقارالىق قۇقىق قورعاۋشىلار قازاقستان بيلىگىن ازاپتاۋدى دوعارۋعا، وعان كىنالىلەردى جاۋاپقا تارتۋعا شاقىرعان.
- باس پروكۋراتۋرا ازاپتاۋ بويىنشا قىلمىستىق ىستەر قوزعالعانىن ايتقانمەن قانشا پوليسەيدىڭ ۇستالعانى تۋرالى اقپارات بەرمەدى.
