ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الماتىدا الاڭدا قالعاندارعا پروكۋراتۋرا مەن اكىمدىك وكىلدەرى كەلدى. پوليسيا بىرنەشە ادامدى ۇستاپ، بوساتتى

14 اقپان 2022 146
13 اقپاندا كۇندىز الماتىنىڭ رەسپۋبليكا الاڭىندا قالعان ونداعان ادامعا جەرگىلىكتى پروكۋراتۋرا جانە اكىمدىك وكىلدەرى كەلىپ، شارانىڭ "زاڭسىز" ەكەنىن ەسكەرتىپ، تاراۋدى سۇرادى. جەكسەنبى كۇنى بىرنەشە ساعاتقا سوزىلعان قاڭتار قىرعىنى قۇرباندارىن ەسكە الۋ شاراسىنان كەيىن جينالعانداردىڭ ءبىر بولىگى تاراپ، ءبىر بولىگى قالعان ەدى.



پوليسيا دەمونسترانتتارعا دۇكەننەن تاماق اكەلۋگە كەتكەن ءۇش ايەلدى ۇستاعان. ولار بوستاندىق اۋداندىق پوليسيا باسقارماسىنا جەتكىزىلگەن. الاڭداعى نارازىلار ولاردى بوساتۋدى جانە الاڭعا اكەلۋدى تالاپ ەتتى. ال پروكۋراتۋرا وكىلدەرى نارازىلار ميتينگىنى توقتاتسا، دەمونسترانتتاردىڭ تالابىن ورىندايتىنىن جەتكىزگەن.

كۇندىزگى 4 جارىم شاماسىندا ۇستالعان ءۇش ادامنىڭ بوساتىلعانى حابارلاندى. پروكۋراتۋرا وكىلدەرى جينالعاندارعا وزدەرىمەن بىرگە پروكۋراتۋراعا بارىپ، تالاپتارى جازىلعان وتىنىشتەرىن تاپسىرۋدى ۇسىنعان. جينالعاندار كەلىسكەن. الاڭدا قالعانداردىڭ باسىم بولىگى – "دەموكراتيالىق پارتيا" قۇرعىسى كەلەتىن باستاما توپ وكىلدەرى. ارتىنشا ون ادام ميكرواۆتوبۋسپەن پروكۋراتۋراعا قاراي كەتتى.

كەشكى ساعات 5 جارىم شاماسىندا الاڭدا ەشكىم قالمادى.

جەكسەنبى تۇستە رەسپۋبليكا الاڭىندا جۇزدەگەن ادام قاتىسقان قاڭتار قۇرباندارىن ەسكە الۋ شاراسى ءوتتى. وعان ەلدەگى ءتۇرلى ساياسي كۇشتەر، بەلسەندىلەر، قالا تۇرعىندارى قاتىستى. جينالعاندار قاڭتار وقيعاسىن تاۋەلسىز زەرتتەۋدى، ۇستالعانداردى ازاپتاۋدى توقتاتۋدى تالاپ ەتتى. كەيبىر پرەزيدەنت قاسىم-جومارت توقايەۆقا يمپيچمەنت جاريالاۋ تۋرالى دا ۇسىنىس ايتقان. بىرنەشە ساعاتقا سوزىلعان شارادان كەيىن نارازىلاردىڭ ءبىر بولىگى تاراپ كەتكەن. ال الاڭدا قالعان ونداعان ادام پالاتكا قۇرىپ، نارازىلىقتى جالعاستىرۋعا وقتالعان ەدى. ولار قالا اكىمى ەربولات دوسايەۆتىڭ الاڭعا كەلۋىن تالاپ ەتكەن. كوپ ۇزاماي ولارعا قۇقىق قورعاۋ ورگان وكىلدەر كەلدى. اۋماقتا پوليسيا كوبەيىپ، اۆتوزاكتار بايقالعان.

  • بيىل قاڭتاردا جاڭاوزەن مەن اقتاۋ قالالارىندا سۇيىتىلعان گاز باعاسىنىڭ قىمباتتاۋىنا بايلانىستى جاپپاي نارازىلىق باستالىپ، ونىڭ سوڭى ەل اۋماعىندا تارتىپسىزدىك پەن زورلىق-زومبىلىققا ۇلاسقان. باسقا ايماقتاردا بولعان قاقتىعىس، اتىس كەسىرىنەن كەمىندە 227 ادام قازا بولدى.

  • قۇقىق قورعاۋشىلاردىڭ ايتۋىنشا، ولاردىڭ باسىم بولىگى بەيبىت ازاماتتار. قوعام تالابىنا قاراماستان بيلىك ولاردىڭ ءاتى-جونىن جاريالاماي كەلەدى.

  • بۇعان دەيىن قۇقىق قورعاۋشىلار مەن بەلسەندىلەر قازا بولعانداردىڭ ءاتى-جونىن ءوز بەتىنشە انىقتاپ، جاريالاعان. ازاتتىق تا ولاردىڭ ءتىزىمىن قۇراستىرعان. 11 اقپاندا كەشكە وقيعا قۇرباندارىنىڭ ءتىزىمى جاريالانعان ازاتتىق پاراقشاسى كەنەت اشىلماي قالدى. ەلدەگى ەڭ ءىرى پروۆايدەر "قازاقتەلەكوم" كومپانياسى تۇسىنىكتەمە بەرمەدى.

  • قازاقستاندا قاڭتار وقيعاسى كەزىندە جانە ودان كەيىن مىڭداعان ادام ۇستالىپ، جۇزدەگەن ادام "تەرروريزم"، "جاپپاي تارتىپسىزدىك"، "قارۋ-جاراقتى ۇرلاۋ" جانە وزگە قىلمىس جاسادى دەگەن كۇدىكپەن قاماۋعا الىندى. ۇستالعانداردىڭ كوبىنىڭ تۋىستارى قاماۋ كەزىندەگى ازاپتاۋلارعا شاعىمداندى: ولاردىڭ سوزىنە قاراعاندا، پوليسيا بولىمشەلەرىندە جاقىندارىنىڭ ۇستىنەن ىستىق سۋ قۇيىپ، ۇتىكپەن جانە ەلەكتروشوكەرمەن كۇيدىرگەن، قاتتى ۇرىپ-سوققان. قىلمىستى مويىنداتۋعا تىرىسقان. بۇعان دەيىن باس پروكۋراتۋرا ۇستالعانداردان ازاپتاۋ جانە زاڭسىز تەرگەۋ ءادىسىن قولدانۋ بويىنشا 300-دەن استام شاعىم تۇسكەنىن، 170ء-ى بويىنشا قىلمىستىق ءىس قوزعالعانىن حابارلاعان. دەگەنمەن ۆەدومستۆو ءالى كۇنگە دەيىن قانشا پوليسەيدىڭ ۇستالعانىن ايتپاي وتىر.

  • حالىقارالىق جانە جەرگىلىكتى قۇقىق قورعاۋشىلار مەن ۇيىمدار قازاقستان بيلىگىنەن وقيعانى جان-جاقتى تاۋەلسىز اشىق زەرتتەۋگە شاقىرعان. وسى اپتادا Human Rights Watch ۇيىمى نۇر-سۇلتاندى زەرتتەۋ توبىنا تاجىريبەلى حالىقارالىق ساراپشىلاردى دا قوسۋعا ۇندەگەن.




[ad_2]

دەرەككوز
بۇل ماقالا تۋرالى نە ويلايسىز؟