ۇزاق جىلدار بويى مەملەكەت مۇددەسىنە ابىرويمەن قىزمەت ەتكەن قازاقستاننىڭ قارۋلى كۇشتەرى مەن قۇقىق قورعاۋ ورگاندارىنىڭ گەنەرالدارى، ارداگەرلەرى وسى كۇنى دە وتان مۇددەسىن قورعاۋدا.
مەملەكەت باسشىسىنىڭ قىركۇيەك ايىنداعى جولداۋىن تالقىلاعاننان كەيىن «گەنەرالدار كەڭەسى» رقب ءتورالقاسى باعدارلامالىق قۇجاتتا باياندالعان ەرەجەلەر مەن ۇسىنىستاردى ىسكە اسىرۋعا بەلسەندى قاتىسۋ تۋرالى شەشىم قابىلدادى. ءبىز بيىل كۇزدە كەزەكتەن تىس پرەزيدەنت سايلاۋىن وتكىزۋ تۋرالى ۇسىنىستى تولىق قولدايمىز. ادىلەتتى قازاقستاندى قۇرۋعا باعىتتالعان رەفورمالاردى تابىستى ىسكە اسىرۋ ءۇشىن حالىق سەنىمىنىڭ جاڭا مانداتى قاجەت.
«پرەزيدەنتتىك مانداتتىڭ ءبىر رەتتىك 7 جىلدىق مەرزىمىن ەنگىزۋدى اشىق دەموكراتيالىق مەملەكەتتىڭ دامۋىنداعى تۇبەگەيلى شارا دەپ سانايمىز. بۇل قادام ەلىمىزدىڭ جاڭا ساياسي ءداۋىرىنىڭ التىن قازىعىنا اينالادى. الەمدەگى كۇردەلى گەوساياسي جاعداي كەزىندە بەيبىتشىلىك پەن كەلىسىمدى باعالاي ءبىلۋ قاجەت. ءبىز، ەل ەگەمەندىگىنىڭ قورعانى بولعان وفيسەرلەر، تاجىريبەلى، قوعامعا قىزمەت ەتۋگە دايىن ساياساتكەر قاسىم-جومارت توقايەۆتىڭ كانديداتۋراسىن سايلاۋعا ۇسىنامىز»، – دەدى وتستاۆكاداعى گەنەرال-مايور، «گەنەرالدار كەڭەسى» رقب ءتوراعاسى ماحمۇت تولەعۇسوۆ.
