ءماجىلىس دەپۋتاتى "شاڭىراققا قارا" دەپ قازاقى مىنەز تانىتتى.

دۇنيەجۇزىلىك ەكىنشى سوعىستا قازاقستان ماسكەۋدىڭ ارتقى شەبىنە اينالىپ ەدى. ورىستىڭ ستراتەگيالىق ماڭىزى بار سالاسىنىڭ ءبارى قازاق جەرىنە كوشىرىلگەن. قازاق ورىس جەرىن قورعاۋ ءۇشىن كەۋدەسىن وققا توسەپ، جانىن پيدا ەتىپ، اۋزىنداعى اسىن جىرىپ بەرگەن. كازىردە سول تاريح قايتالانىپ جاتقانداي...رەسەيدەن اعىلعان ورىس كوشىنىڭ تولقىنى باسىلماي تۇر. الەم نازارىن اۋدارعان تۇيتكىلدى ماسەلەگە كوپتىڭ پىكىرىمەن بىرگە، رەسمي بيلىكتىڭ دە پوزيسياسى، ناقتى قيمىلىن ءبىلۋ ماڭىزدى. پرەزيدەنت توقايەۆ ەلىمىزگە اعىلىپ جاتقان رەسەي ازاماتتارىنا قاتىستى ويىن ايتقاننان كەيىن ۇكىمەتكە ءتىل ءبىتتى. ەۋرازيا ەكونوميكالىق وداعىنىڭ كەلىسىم-شارتتارىن العا تارتىپ، موبليزاسيادان قاشقاندارعا زاڭ اياسىندا جاعداي جاسالاتىنىن جەتكىزدى.

بۇرىننان شاتقاياقتاپ ءتۇرعان ەكونوميكالىق، الەۋمەتتىك ماسەلەلەرگە قيىندىق تۋدىرىپ تۇرعان تاۋەلسىزدىك كەزەڭدەگى ەڭ اۋقىمدى ورىس كوشىنە مەيلى ۇكىمەت بولسىن، مەيلى پارلامەنت بولسىن، ءبىرىنىڭ اۋزىنا ءبىرى تۇكىرىپ العانداي ەۋرازيا ەكونوميكالىق وداعىن العا تارتقاننان باسقا، ەل يلاناتىنداي تۇشىمدى جاۋاپ ايتا الماۋدا. ءتىپتى، كەي دەپۋتات تۇندەگى تويدىڭ اسەرىنەن ارىلا الماي جۇرگەندەي "كەلگەندەرگە قۇراق ۇشپاساق قوناقجايلىعىمىز قايدا؟" دەپ پىكىر ءبىلدىرىپتى.

پرەزيدەنتتەن كەيىنگى ەكىنشى لاۋازىم يەسى سانالاتىن سەنات ءتوراعاسى ماۋلەن اشىمبايەۆ تا ساياسي بىلىكتىلىگىن كورسەتكىسى كەلگەندەي، تاعى دا سول رەسەي باسشىلىعىنداعى وداقتى العا تارتتى.

جاقىندا ەلوردانىڭ اتىن اۋىستىردىق. اتا زاڭعا دا وزگەرىستەر ەنگىزىلىپ، ساياسي جاڭارۋعا قادامدار جاسالىپ جاتىر. جاڭا قازاقستان قۇرۋ - ىشكى رەفورمانى عانا بىلدىرمەيدى. سىرتقى ساياساتتا دا جاڭا باعىت ايقىنداۋدان كورىنەدى. رەسەي ىقپالىنداعى قاپتاعان وداقتار مەن ۇيىمدارعا نازاربايەۆ بيلىگى كەزىندە قول قويىلعانى بەلگىلى. ەندەشە ول كەلىسىمدەرگە دە بۇگىنگى ۋاقىت تەزىمەن، جاڭا قازاقستان كوزىمەن قارايتىن ۋاقىت جەتتى. ەسكى كەلىسىم-شارتتار قازاقتىڭ كوسەگەسىن كوگەرتپەيدى. قازىرگى قىمباتشىلىقتان دا قۇتقارمايدى. بيلىك پەن حالىقتىڭ اراسىن الشاقتاتادى. جاڭارعان گرۋزين ەلىنىڭ سوعىستان قاشقان ورىستارعا ۇستانعان پوزيسياسى بىزگە ۇلگى بولسا، كانى!

گرۋزيانىڭ كەدەنشىلەرى "سوعىسقا قارسىمىن"، "پۋتين اگرەسسور" دەۋگە باتىلى جەتكەن رەسەيلىكتەردى عانا كىرگىزىپ جاتىر ەكەن. ەكس-پرەزيدەنتى ساكاشۆيلي دە: "ورىستىڭ كوبەيۋى ەلدىڭ دەموگرافياسىنا اسەر ەتەدى"، - دەپ مالىمدەدى. ءبىزدىڭ شەندىلەردىڭ وزگەدەن نەسى كەم؟! ەل ويلاعاندى، بىزدىكىلەر دە ويلاي الادى، تىلىنە دە تۇساۋ جوق. بار بولعانى ساياسي باتىلدىق جەتپەيدى. مۇنداي جالتاقتىقتىڭ شەندىلەرگە ساياسي ۇپاي، ازاماتتىق بەدەل اپەرمەسى انىق

سەنات ءتوراعاسىنا قاراعاندا، ءماجىلىس دەپۋتاتى دەمەنتيەۆا ناتاليا ەرلەدى. باقاي ەسەپكە جۇيرىك كەي جەرلەستەرىمىزدىڭ پايداكۇنەمدىگىنە وكىنىش ءبىلدىرىپ، قانداستارىنا "قازاق ەلىندە تۇرام دەسەڭ ءتىلىن ءبىل، سالتىن قۇرمەتتە" دەپ ۇندەۋ ءسوز ايتتى. كەلىمسەكتەرگە "شاڭىراققا قارا" دەپ قازاقى مىنەز تانىتتى.  30 جىل قازاق ءتىلى دەپ زارلاعانداردىڭ جاراپازانىنان ناتاليانىڭ سىن ساتتە ايتقان وسى ءبىر اۋىز ءسوزى وزەكتى بولىپ تۇر.

ەسبول ۇسەن ۇلى

Abai.kz