26 ساۋىردە ماسكەۋدە رەسەي پرەزيدەنتى ۆلاديمير پۋتين بۇۇ باس حاتشىسى انتونيۋ گۋتەرريشپەن كەزدەستى. شامامەن ءبىر ساعاتقا سوزىلعان كەلىسسوزدىڭ باستى تاقىرىبى ۋكرايناداعى جاعداي بولدى.
كەزدەسۋ كەزىندە ۆلاديمير پۋتين رەسەي ۋكراينامەن كەلىسۋگە بەيىل ەكەنىن جانە جاعدايدى ديپلوماتيالىق تۇرعىدا رەتتەۋدەن باس تارتپايتىنىن جەتكىزدى. ول ستامبۋلداعى كەلىسسوزدىڭ ءساتتى وتكەنىن اتاپ ءوتتى.
"ەلەۋلى ىلگەرىلەۋشىلىككە قول جەتكىزدىك. ۋكراينالىق ارىپتەستەرىمىز قاۋىپسىزدىككە كەپىلدىكتى ۋكراينانىڭ حالىقارالىق دارەجەدە مويىندالعان شەكاراسى دەگەن ۇعىممەن بايلانىستىرعان جوق" دەدى پۋتين.
ستامبۋلداعى كەلىسسوزدەن كەيىن ماسكەۋدىڭ "ارانداتۋعا" ۇشىراعانىن ايتقان رەسەي پرەزيدەنتى بۇدان سوڭ بىرنەشە ءجۇز ادام قىرىلعان ۋكراينانىڭ بۋچا قالاسىنداعى قىرعىن تۋرالى ايتقان.
ءپۋتيننىڭ ايتۋىنشا، ءدال وسى جاعداي ەكى ەل اراسىنداعى كەلىسسوزدەرگە "بوگەت" بولعان. رەسەي باسشىسىنىڭ سوزىنشە، ۋكراينا اۋەلى دونباسس پەن قىرىم ماسەلەلەرىن ەرەكشە بولمەي-اق تالقىلاۋعا دايىن بولعان، ءبىراق بۋچاداعى جاعدايدان كەيىن ولاردى تالقىلاۋدان مۇلدە باس تارتقان.
بۇۇ باس حاتشىسى انتونيۋ گۋتەرريش تۇركيانىڭ ەكى ەل باسشىلارىنىڭ كەلىسسوزىن ۇيىمداستىرۋ نيەتىن قولداپ، سونىمەن بىرگە گۋمانيتارلىق ءدالىز بويىنشا بۇۇ-رەسەي-ۋكراينا بايلانىس توبىن قۇرۋدى ۇسىندى.
اتاپ ايتقاندا، گۋتەرريش ماريۋپولدە "ازوۆستال" زاۋىتىنداعى ادامداردى ەۆاكۋاسيالاۋ ماسەلەسىن شەشۋدى ۇسىندى. بۇۇ باس حاتشىسى كەڭسەسىنىڭ اقپاراتىنا سايكەس، رەسەي پرەزيدەنتى زاۋىت اۋماعىندا قالعان بەيبىت ازاماتتاردى ەۆاكۋاسيالاۋ ءۇشىن قىزىل كرەست جانە بۇۇ-نى تارتۋعا كەلىسكەن.
ۆلاديمير پۋتين ماريۋپولدە اسكەري قيمىلدار توقتاعانىن، 1300-دەن استام ۋكراين اسكەرى تۇتقىنعا تۇسكەنىن، رەسەيدىڭ ارالاسۋىمەن ماريۋپولدەن 140 مىڭ تۇرعىن ەۆاكۋاسيالانعانىن ايتقان.
گۋتەرريش كەلىسسوز كەزىندە رەسەيدىڭ ۋكرايناداعى ارەكەتىن سۋۆەرەندى ەلگە باسىپ كىرۋ دەپ اتادى. ال پۋتين ۋكرايناعا باسىپ كىرۋگە "ءماجبۇر" بولعانىن، ۋكراينا بيلىگىنىڭ كەسىرىنەن دونباسس تۇرعىندارى "وقشاۋلانىپ قالعانىن" ايتقان.
بۇل رەسەي ۋكرايناعا باسىپ كىرگەلى بەرى بۇۇ باس حاتشىسى انتونيۋ گۋتەرريشتىڭ ماسكەۋگە العاشقى ساپارى. 26 ساۋىردە گۋتەرريش رەسەي سىرتقى ىستەر ءمينيسترى سەرگەي لاۆروۆپەن دە كەزدەسكەن.
بۇۇ باس حاتشىسى ماسكەۋدەن كييەۆكە اتتانادى. ونىڭ ساپارىن ماسكەۋدەن باستاۋىن ۋكراينا پرەزيدەنتى ۆلاديمير زەلەنسكيي سىنادى. زەلەنسكيي بۇۇ باس حاتشىسى اۋەلى رەسەي اسكەرى قيراتقان ۋكراين قالالارىن كورىپ، ودان كەيىن ماسكەۋگە بارۋى ءتيىس ەدى دەپ سانايدى.
