ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

نامازحان بولعانى ءۇشىن سەندىك - Mudarabah Capital-دىڭ سالىمشىلارى

27 ءساۋىر 2022 90

تانىمال ۆاينەرلەر مەن ارتىستەر جارنامالاعان «Astex.kz» كومپانياسىنا 160-تان استام سالىمشى اقشا اۋدارعان. قارجى ۇيىمىنىڭ باسشىلارى سالىمشىلارعا ورتاق تۇسىمنەن اي سايىن 20% مولشەردە سىياقى تولەپ وتىرۋعا ۋادە بەرگەن.

ازاتتىق رۋحىنىڭ حابارلاۋىنشا، جەڭىل پايداعا قىزىققان ادامدار قارجىلىق پيراميداعا وزدەرىنىڭ جيعان-تەرگەندەرىن عانا ەمەس، تانىستارىنىڭ دا اقشاسىن اۋدارتقان.

«جينالعان سەبەبىمىزدىڭ باستى ماقساتى – ۇستالعان كەيبىر ادامداردىڭ «Astex.kz» كومپانياسىنا مۇلدەم قاتىسىنىڭ جوقتىعى. ءبىز تەرگەۋدىڭ جانە وسىعان قاتىسى بار ادامداردىڭ جازالانۋىن، سالىنعان اقشالاردىڭ قايتارىلۋىن تالاپ ەتەمىز. زارداپ شەككەن 160-170 ادام بار، ولاردىڭ دا قۇقىعى ساقتالۋ كەرەك. ءبىز اقشانى «Astex.kz» كومپانياسىنا قۇيدىق. «Mudarabah Capital» سالىمشىلارىنىڭ بىزگە قاتىسى جوق. ەكەۋىنىڭ سالىمشىلارى ەكى بولەك. «Astex.kz» تەندەرگە قاتىسىپ، ودان تاپقان پايدانىڭ 10-20% ارالىعىندا بىزبەن ءبولىستى. 20% كوپ ەمەس، ءبىر نارسەنى ساتىپ، پايدا كورۋ ءۇشىن 30-40% قوسپاسا، ودان كىرىس بولمايدى. ويتكەنى ينفلياسيا جوعارى، ققس-نىڭ ءوزى 12%. ودان باسقا ءوفيستى جالعا الۋ، جول شىعىندارى بار. پايداسىن بىر-ەكى اي كوردىك. ءبىز بۇلارعا تانىستار ارقىلى كەلدىك. ءقازىر «Mudarabah Capital» سالىمشىلارىنىڭ قايتا-قايتا ارالاسۋىمەن تەرگەۋ ءىسى سوزىلىپ جاتىر. بۇل ماسەلە 2021 جىلدىڭ اقپان ايىندا باستالدى. ءساۋىردىڭ 27 كۇنى پوليسياعا ارىز جازدىم. مامىر ايىندا الماس قۇرمانعالييەۆ قامالدى. مەن اي سايىن 20% پايدا كورىپ وتىرۋىم كەرەك ەدى. سوتتىڭ قورىتىندىسى بويىنشا ولار ماعان 18 ملن تەڭگە قارىز. شىندىعىندا مەن ودان دا كوپ اقشا اۋدارعام» دەدى «Astex.kz» ج ش س سالىمشىسى ۇلان باقىربايەۆ.

كومپانيانىڭ قۇرىلتايشىسى الماس قۇرمانعالييەۆ قامالعالى، سالىمشىلار پايىزدىق تولەم الا الماي قالعان. ولاردىڭ ايتۋىنشا، ادامدار تەك ءبىر «Astex.kz» قارجىلىق ۇيىمىنىڭ وزىنە 1 ملرد 124 ملن تەڭگە اۋدارعان. سونداي-اق، ولار ەكى كومپانيانىڭ تەرگەۋى بولەك جۇرگىزىلۋى كەرەك ەكەنىن العا تارتتى.

قارجى پيراميداسىنا اقشا قۇيعانداردىڭ قاتارىندا بەس بالانىڭ اناسى گۇلميرا قۇرمانبەك قىزى دا بار. ول بانكتەن 29 ملن تەڭگە قارىز الىپ، «Astex.kz» جشس-نە اپارىپ بەرگەن. كومپانيا باسشىلارى شەتىنەن نامازحان بولعاندىقتان ولاردىڭ سوزىنە سەنىپ قالدىم دەيدى كوپبالالى انا.

«الماس قۇرمانعالييەۆتىڭ ءىنىسى شىڭعىس قۇرمانعالييەۆ بىزگە اعاسى ءۇشىن اقشامىزدى ءبولىپ-بولىپ قايتارىپ جاتىر. مەن قۇيعان 29 ملن تەڭگەنىڭ جارتىسىن قايتارىپ الدىم. وتباسىمىزبەن ۇلكەن ءىس باستايىق دەپ نەسيە العان ەدىك. اقشا بيزنەسكە ەمەس، وسى پيراميداعا كەتىپ قالدى. ءقازىر «Astex.kz» سالىمشىلاردىڭ اقشاسىن قايتارا باستاعان كەزدە، «Mudarabah Capital» ج ش س اقشا بەرگەن ادامدار شىعىپ، ءبىز دە قاراجاتىمىزدى «Astex.kz»-كە سالعانبىز دەپ وتىرىك ايتىپ جاتىر. ولار كىمگە اقشا بەردى سولاردان سۇراۋ كەرەك. ويتكەنى، «Mudarabah Capital» قارجى ۇيىمىنىڭ سالىمشىلارى دا، ول جاقتاعى قاراجات كولەمى دە كوپ. ءبىز 4 اي اۋديت جاسادىق، بۇكىل قۇجاتتاردى تەكسەردىك. 128 ادامنىڭ الدىنداعى بەرەشەكتى قۇرمانالييەۆتىڭ ءىنىسى شىڭعىس موينىنا الىپ، تولەيمىن دەپ وتىر. نەگىزى ەكى كومپانيانىڭ ءبىر بىرىنە قاتىسى جوق. شىڭعىستىڭ بىزگە اقشامىزدى بىرتىندەپ قايتارىپ جاتقانىن ەستىگەن «Mudarabah Capital» ۇيىمىنىڭ سالىمشىلارى كورە الماۋشىلىقپەن «Astex.kz»-كە جالا جاۋىپ جاتىر» دەيدى قارجى پيراميداسىنا الدانعان گۇلنار قۇرمانبەك قىزى.

ول ءقازىر بانككە اي سايىن 2،5 ملن تەڭگە كولەمىندە نەسيە تولەپ وتىرعانىن ايتتى.

ەسكە سالساق بۇعان دەيىن الماتى قالاسىنىڭ قىلمىستىق ىستەر جونىندەگى سوت القاسى «Mudarabah Capital» قارجىلىق پيراميداسىنا قاتىسى بار دەپ تانىلعان ۆاينەرلەر مەيىرجان تورەبايەۆ پەن مەيىرحان شەرنيازوۆتى ون تاۋلىككە قاماعان بولاتىن. ال، «Astex.kz» قارجىلىق ۇيىمىنىڭ باسشىسى الماس قۇرمانعالييەۆتىڭ قاماۋدا وتىرعانىنا ءبىر جىلعا جۋىقتادى. ونىڭ ءىنىسى سالىمشىلاردىڭ 120 ملن تەڭگەسىن قايتارىپ بەرگەن. اعاسىنىڭ حالىق الدىنداعى بەرەشەگىن بىرتىندەپ تولەيمىن دەيدى ول.

2020 جىلى 82 ملن تەڭگەسىن وسى قارجى پيراميداسىنا سالعان ءىلياس نۇرلان ۇلى دا اقشاسىن تولىق قايتارىپ الۋدان ءۇمىتتى. ءقازىر جارتىسىنان استامىن ءوندىرىپتى. «Mudarabah Capital» سالىمشىلارى كەدەرگى كەلتىرمەسە قالعانىن دا قايتارۋى كەرەك دەيدى ول.

«العاش رەت قارجىلىق ۇيىمعا 2020 جىلدىڭ ناۋرىز ايىنان باستاپ اقشامدى سالدىم دا، سول جىلدىڭ سوڭىنا دەيىن ۇستىندەگى مارجاسىن الىپ ءجۇردىم. پروبلەما 2021 جىلدان باستالدى. ءبىز سول كەزدە ۇجىمدىق ارىز جازدىق، سونىڭ نەگىزىندە قۇرمانعالييەۆتى قاماۋعا الدى. ءبىز بۇل كومپانياعا تانىستار ارقىلى كەلدىك. ءقازىر ەكى كومپانيانىڭ سالىمشىلارى بىر-بىرىمەن داۋلاسىپ جاتىر. مەن بۇل كومپانياعا 82 ملن تەڭگە سالدىم، بۇگىنگە دەيىن سونىڭ 50 ملن تەڭگەدەن استامىن قايتارىپ الدىم» دەدى ءىلياس نۇرلان ۇلى.

ءىىم تەرگەۋ دەپارتامەنتىنىڭ مالىمەتىنشە، بىلتىر 31 مىڭنان استام ازامات قارجى پيراميدالارىنىڭ قۇربانى بولعان. انشىلەر مەن بلوگەرلەر جارنامالاعان الاياق ۇيىمدار قاراپايىم ادامدارعا 54 ملرد تەڭگەنىڭ زالالىن كەلتىرگەن. بۇگىنگى تاڭدا ىشكى ىستەر ورگاندارىنىڭ وندىرىسىندە وسى ساناتتاعى 70-كە جۋىق قىلمىستىق ءىس بار. ارىزداردىڭ نەگىزىندە 3 مىڭنان استام جابىرلەنۋشى تىركەلگەن.



دەرەككوز
بۇل ماقالا تۋرالى نە ويلايسىز؟