ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

وزبەكستان: تالىپتەر اۋعانستاندى "تەرروريستەردەن تازالاپ جاتىر"

11 اقپان 2022 87
وزبەكستان سىرتقى ىستەر ءمينيسترى ابدۋلازيز كاميلوۆ "تاليبان" قوزعالىسى اۋعانستاندى تەرروريستەردەن تازالاپ جاتقانىن مالىمدەدى. بۇل تۋرالى لاتۆيانىڭ ءسىم باسشىسى ەدگارس رينكيەۆيچسپەن كەزدەسۋدەن كەيىنگى باسپا ءسوز ءماسليحاتىندا ايتىلدى.

"تالىپتەر ولكەنى تەرروريستەردەن تازالاۋ ءۇشىن وتە كوپ ءىس ىستەپ جاتىر. بۇدان بولەك ولار ايماقتىق جانە حالىقارالىق ەكونوميكالىق قاۋىمداستىقتارمەن ينتەگراسيا بولعانىن قالايدى. ءبىز ولاردىڭ مۇنداي ارەكەتىن قولداپ، سونىمەن بىرگە زورلىق-زومبىلىقتى توقتاتۋ، تەرروريزمدى جويۋ، دوستىق كورشى كەلىسىمدەردى قۇرۋ جانە اۋعان ەلىنىڭ جاعدايىن جاقسارتۋ سەكىلدى شارتتارمەن تالاپ ەتۋىمىز كەرەك"،- دەدى كاميلوۆ.

ونىڭ سوزىنشە، اۋعانستانعا كومەك بەرگەن وزبەكستاننىڭ جالعىز ماقساتى — بۇل ولكەدە گۋمانيتارلىق اپاتتى بولدىرماۋ. مينيستر وزبەك تاراپتىڭ باستاماسىمەن اۋعانستانعا گۋمانيتارلىق كومەك جەتكىزۋدى ۇيىمداستىرۋ ءۇشىن تەرمەزدە كوپ فۋنكسيالى حالىقارالىق كولىك حاب قۇرىلعانىن تاعى ءبىر اتاپ ءوتتى.

"ءقازىر بۇل ولكەدەگى ۋاقىتشا ۇكىمەتتى تانۋ جانە تانىماۋ جونىندە كوپتەگەن پىكىرلەر بار. ءبىز ءتالىپ ۇكىمەتىن تانۋ ماسەلەسى ولاردىڭ ارەكەتىنە قاراي شەشىلۋى كەرەك دەپ ەسەپتەيمىز. اتاپ ايتساق، ۋاقىتشا ۇكىمەت ءوز ۋادەلەرىن اتقارۋى ءتيىس، بۇعان سونىمەن بىرگە حالىقارالىق قاۋىمداستىق قويىپ وتىرعان تالاپتى دا ورىنداۋ كىرەدى"،- دەدى كاميلوۆ.

تالىپتەر اۋعانستاندا بيلىكتى 2021 جىلدىڭ تامىز ايىندا باسىپ العان. ازىرگە ولاردى الەمنىڭ بىردە-بىر ەلى مويىندامادى.
بۇل ماقالا تۋرالى نە ويلايسىز؟