ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

نازاربايەۆتىڭ قىزى مەن كۇيەۋ بالاسى گەرمانيادا قۇنى 100 ميلليون ەۋرو تۇراتىن مۇلىككە يەلىك ەتەدى

11 اقپان 2022 57
قازاقستاننىڭ ەكس-پرەزيدەنتى نۇرسۇلتان نازاربايەۆتىڭ ورتانشى قىزى دينارا نازاربايەۆا مەن ونىڭ كۇيەۋى تيمۋر قۇلىبايەۆقا بايلانىسى بار كومپانيالار گەرمانيانىڭ زەەلو قالاسىندا 100 ميلليون ەۋروعا باعالانعان ۆيللاعا، حانسارايعا جانە ەكى مەيمانحاناعا يەلىك ەتەدى. بۇل تۋرالى ازاتتىق جازدى.

وسىلاي دەپ Deutsche Welle (DW) باسىلىمى حابارلادى.

مالىمەتكە قاراعاندا، 19 عاسىردا زەەلوداعى حانساراي بەلگىلى ورىس ديپلوماتى، قۇپيا كەڭەسشى ميحايل حرەپتوۆيچتىڭ جازعى رەزيدەنسياسى بولعان. ونىڭ قازاقستاندىق جاڭا قوجايىندارى ون جىل بويى قايتا جوندەۋ جۇمىستارىن جۇرگىزىپ، قۇرىلىستى ەكى جىل بۇرىن عانا اياقتاعان.

وندا فونتاندار ورناتىلعان لاندشافتتى ساياباق جانە 1 مىڭ شارشى مەتر جەردى الىپ جاتقان سپا الاڭى بار. 25 مەترلىك باسسەين ۇستىندەگى تەرەزە كوسموستان تۇسىرىلگەن سۋرەتتەردەن دە كورىنىپ تۇر.

بۇل مۇلىكتىڭ باعاسى 60 ميلليون ەۋرو. جۋرناليستەر گەرمانياداعى كومپانيالاردىڭ رەەسترىنە سىلتەمە جاساپ، وبەكتىدە رەكونسترۋكسيا جۇمىسىن جۇرگىزگەن جىلدارى Schloss Seelach Invest كومپانياسىنىڭ جارعىلىق كاپيتالى دا ءدال وسىنداي سوماعا كوبەيگەنىن بىلدىرەدى.

ءۇيدى قايتا جوندەۋ جۇمىسىنا قاتىسقان ادامداردىڭ ءبىرىنىڭ ايتۋىنشا، ءۇي يەلەرى بۇل ءۇشىن "اقشا اياعان ەمەس". جۇمىسشىلار ءاربىر اتقارعان جۇمىستارىن سۋرەتكە ءتۇسىرىپ، قازاقستانعا جىبەرىپ وتىرعان.

بۇدان بولەك نازاربايەۆتاردىڭ وتباسىنا ۆيللا مەن ەكى مەيرامحانا تيەسىلى. حانسارايعا يەلىك ەتەتىن Schloss Seelach Invest GmbH كومپانياسى Verus Praedium International قازاق كومپانياسىنا تيەسىلى. ءوز كەزەگىندە وعان "الماتىداعى "كيپروس" كومپانياسى يەلىك ەتەدى. اشىق رەەستردەگى تىزىمگە سايكەس، تيمۋر قۇلىبايەۆ Schloss Seelach Invest GmbH كومپانياسىنىڭ بەنەفيسيارى بولىپ سانالادى.

ول رەەسترگە سايكەس، تيمۋر جانە دينارا قۇلىبايەۆالار قازاقستانداعى Mercury Properties كومپانياسى ارقىلى گەرمانياداعى Bühlerhöhe Castle Invest GmbH كومپانياسىنا يەلىك ەتەدى. بۇل كومپانياعا گەرمانياداعى ەكى مەيمانحانا تيەسىلى.
بۇل ماقالا تۋرالى نە ويلايسىز؟