م.باقتيار ۇلى: وقۋلىق بيزنەسكە اينالىپ كەتتى. دەپۋتاتتىق ساۋالىمدا ايتقانمىن، وقۋلىقتى بەلگىلى ءبىر مەملەكەتتىك ورگان جاساۋى كەرەك. ال ءبىز ولاي جاساعان جوقپىز. كوكپار تارتقانداي، باسەكەگە سالدىق تا جىبەردىك. ءار باسپا وزدەرى اۆتور تاۋىپ وقۋلىق جازدىرادى، وزدەرى ديزاينەر تاۋىپ جاساتادى، وزدەرى باسىپ شىعارادى. نارىق زامانىندا بۇل بىلاي دۇرىس سياقتى كورىنەدى. ءبىراق ولاي بولماۋ كەرەك. وقۋلىقتى ءار پەداگوگ وزىنشە جازىپ، ءار باسپا وزىنشە شىعارسا، ءبىلىم الا-قۇلا، وقۋشى دا بىردەي ءبىلىم المايدى. سوندىقتان، مەملەكەت مۇنداي الاقۇلالىققا جول بەرمەۋ كەرەك. وقۋلىق ءبىر ورتالىقتا جازىلىپ، ءبىر عانا باسپادان شىعۋ كەرەك. ول مەملەكەتتىك بولۋ كەرەك. جەكە مەنشىك دەگەن ءبىلىم سالاسىنا جارامايدى.
كەڭەس ۇكىمەتى كەزىندە «مەكتەپ» باسپاسى دەگەن بولدى. ىبىراي التىنسارين دەگەن عىلمي زەرتتەۋ ينستيتۋتى بولدى. سول ورتالىقتا مىقتى-مىقتى پەداگوگ ماماندار جۇمىس ىستەدى. وقۋلىقتىڭ كونسەپسياسىن سولار جاسايتىن. ءبىر وقۋلىق 10 جىلعا دەيىن جەتەتىن. ال ءبىز جىل سايىن جاڭا وقۋلىق جازدىرامىز. مەملەكەتتەن ميللياردتاعان اقشا الادى. سوندىقتان، وقۋلىقتى مەملەكەت قولىنا الۋ كەرەك. جەكە مەنشىك باسپاعا بالانىڭ تاعدىرىن سەنىپ تاپسىرۋعا بولمايدى. بالا وسى ەلدىڭ، وسى مەملەكەتتىڭ بولاشاعى. وقۋلىق، ءبىرىنشى كەزەكتە ءبىلىم، ودان كەيىن تاربيە، سوسىن يدەيالوگيا. سوندىقتان، ونى مەملەكەت ءوزى قولىنا الىپ، ءبىر ورتالىقتان شىعارۋى قاجەت. ول ورتالىقتا ەڭ ءبىلىمدى پەداگوگ، بىلىكتى عالىم، مىقتى رەداكتور، شەبەر ديزاينەر جۇمىس ىستەۋى كەرەك. جوعارى جالاقى تولەنۋى كەرەك.
