"ونى اتىپ ءولتىرىپ كەتتى". ءاليا نازاربايەۆانىڭ رەيدەرلىك ارەكەتتەرى اشىلىپ جاتىر

كاسىپكەر نۇرلان بيمۋرزين ءاليا نازاربايەۆانىڭ رەيدەرلىك ارەكەتتەرى تۋرالى 20 جىل بويى نەگە ايتپاعانىن ءتۇسىندىردى، - دەپ حابارلايدى Alash.kz.

ءبيمۋرزيننىڭ سوزىنشە،20 جىل بويى بۇل ءىس تۋرالى جاريا ەتۋگە ەشكىمنىڭ كۇشى جەتپەگەن. 

"ونى كىم جاريا قىلار ەدى؟ كەرەك ادامدار بۇل جايلى ءبىلدى. 21 جىل بۇرىن جانە 2019 جىلعا دەيىن بىزگە مۇنى جاريا ەتۋگە كىم رۇقسات بەرەتىن ەدى؟ گازەتتەرگە جاريالاعان كۇننىڭ وزىندە تاۋلىگىنە 25 ساعات، اپتاسىنا 8 كۇن وتباسىمدى كۇزەتىپ ءجۇرۋىم كەرەك بولار ەدى. ءقازىر ءبىز ادىلدىك ءۇشىن كۇرەسىپ ءجۇرمىز. كوپ ادام ءبىز نە ءۇشىن قىلمىستىق ءىس قوزعالعانىن تالاپ ەتىپ جۇرگەنىمىزدى تۇسىنبەي جاتادى. زاڭ بويىنشا ارىز جازىلدى ما – قىلمىستىق ءىس مىندەتتى تۇردە قوزعالۋى كەرەك. تەرگەۋ ءجۇرۋى كەرەك. بارلىق ادام تەرگەۋدەن ءوتۋى كەرەك. تەرگەۋ تولىق ءوتۋى ءۇشىن ءاليادان دا جاۋاپ الىنۋى كەرەك. ءبىراق وعان ەشكىمنىڭ ءالى جەتپەيدى. سوندىقتان وسىنداي جاعداي بولىپ وتىر"، - دەيدى نۇرلان بيمۋرزين Elmedia-عا بەرگەن سۇحباتىندا.

سونىمەن قاتار، بيمۋرزين بيزنەس يمپەرياسىنىڭ نەگىزىن قالاعان اكەسى تۋرالى ايتتى دەپ جازدى Dalanews.kz.

"ونى اتىپ ءولتىرىپ كەتتى. مەنەن كوپ ادام "بۇل  جاعدايعا كىم كىنالى دەپ ويلايسىڭ؟" دەپ سۇرايدى. ەشكىمدى كىنالامايمىن، بۇعان بولعان جايت قانا كىنالى. ەگەر ءبىزدىڭ بيزنەسىمىزدى تارتىپ الماسا، مۇنداي جاعداي بولماس ەدى"، - دەيدى كاسىپكەر.

نۇرلان بيمۋرزين قازىرگى تاڭدا ءاليا نازاربايەۆانىڭ رەيدەرلىك ارەكەتىنە قاتىستى قىلمىستىق ءىس قوزعاۋ امالدارى قالاي ءجۇرىپ جاتقانىن ايتتى. ونىڭ سوزىنشە، باس پروكۋراتۋرا بۇل ءىستى الماتىنىڭ ىشكى ىستەر باسقارماسىنا "لاقتىرىپ" جىبەرگەن.

"بىرىنشىدەن، ءبىز باس پروكۋراتۋراعا ارىز جازامىز. مەن جوعارىداعىلار ءوز ارالارىندا بۇل جاعدايدى ءتۇسىنىپ وتىر دەپ ويلايمىن. اقىر سوڭىندا بۇل ءىس باس پروكۋراتۋرادان الماتىداعى المالى اۋداندىق ىشكى ىستەر باسقارماسىنا ءبىراق تۇسكەن. ءىس نە ءۇشىن ول جەرگە تۇسكەنىن تۇسىنبەدىك، قۇرىسىنشى دەدىك. بارلىق دالەل بازاسىن كورسەتتىك. ال بىرنەشە كۇننەن كەيىن ول جەردەن قىلمىستىق ءىس قوزعالمايتىنى تۋرالى راپورت الدىق. المالى اۋداندىق پروكۋراتۋراعا ارىزداندىق، ولار ىشكى ىستەر باسقارماسىنىڭ شەشىمىن جوققا شىعاردى. سوسىن ءىس الماتىنىڭ ەكونوميكالىق تەرگەۋ باسقارماسىنا ءتۇستى. ءبىز بۇل ارەكەتتەرىنە تاڭعالدىق"، - دەيدى كاسىپكەر.

ايتا كەتەيىك، بيىل 28 اقپاندا "TPK Asia" ج ش س قۇرىلتايشىسى نۇرلان بيمۋرزين سەرىكتەسى مەگدات قالييەۆ ەكەۋى نازاربايەۆا مەن روگوۆانىڭ رەيدەرلىك شابۋىلىنىڭ قۇربانى بولعانىن مالىمدەگەن بولاتىن.

ءبيمۋرزيننىڭ ايتۋىنشا، 2003 جىلى ءاليا نازاربايەۆا ءوز ىقپالىن پايدالانا وتىرىپ، قۇنى 170 ميلليون دوللار بولاتىن (2003 جىلعى ەسەپ بويىنشا - ەسك.) جەتى مۇناي بازاسى مەن 96 جانارماي قۇيۋ بەكەتىن تارتىپ العان.

"باسىندا قارجى پوليسياسى قىسىم كورسەتتى. سوسىن ءاليا نازاربايەۆانىڭ وكىلى كەلىپ، بىزگە قورعان بولۋعا شامالارى جەتەتىنىن جەتكىزدى. ول ءۇشىن بيزنەستىڭ 50 پايىزى بەرىلۋى كەرەگىن ايتتى. ءبىر جىلدان كەيىن ءاليا نازاربايەۆا ەندى قالعان ۇلەستى دە بەرۋ كەرەگىن ەسكەرتتى. سول جىلى مەنىڭ اكەمدى ولار الىپ كەتىپ، نازاربايەۆانىڭ كەڭسەسىنە اپارعان. اكەممەن سويلەسكەن. ەكى ۇلىڭ ءۇشىن الاڭداساڭ، بيزنەسىڭدى بەر دەگەن. امال جوق، اكەم كەلىسەدى. 

كەلەسى كۇنى مەن باردىم. ول جەردە ءاليا بولعان جوق، ءبىراق ونىڭ ورنىنا روگوۆا بولدى. مەن سول جەردە ۇلەسىمدى بار جوعى 18 125 تەڭگەگە ساتۋعا ءماجبۇر بولدىم"، - دەيدى نۇرلان بيمۋرزين.

14 ناۋرىزدا باس پروكۋراتۋرا نازاربايەۆانىڭ رەيدەرلىك ارەكەتى تۋرالى ارىزىن تىركەگەنىن حابارلادى. الايدا 5 ساۋىردە پوليسيا ەكس-پرەزيدەنتتىڭ كەنجە قىزىنا قاتىستى قىلمىستىق ءىس قوزعاۋدان باس تارتقانى بەلگىلى بولدى.