بۇگىن حالىقارالىق بالالاردى قورعاۋ كۇنى. بۇل كۇنى بارلىق اتا-انا كىشكەنتاي بالاقايلارعا ەرەكشە كوڭىل بولەدى. اۋىل-ايماق، قالالاردا وسى كۇنگە ارنالعان ءتۇرلى كونسەرتتەر ۇيىمداستىرىلىپ، ءتىپتى كەيبىر كومپانيالار نەمەسە ورتالىقتار اتالعان كۇنى بالالارعا ارناپ ارنايى سىي دايىندايدى، دەپ حابارلايدى Alash.KZ ۇلتتىق پورتالى.
تيمۋر قۇلىبايەۆ باستاعان «حالىق» قايىرىمدىلىق قورى قۇرىلعان كۇننەن باستاپ ماڭىزدى الەۋمەتتىك ماسەلەلەردى شەشۋدە بەلسەندى جۇمىس اتقارىپ كەلەدى. وسى جىلدار ىشىندە قور 10 مىڭ اۋىل بالالارىن فۋتبول جابدىقتارىمەن قامتاماسىز ەتتى، 280 ورىندىق بالاباقشا سالدى، 50-دەن استام بالالار مەن فۋتبول اۋلالىق كەشەندەرىن ورناتتى. ءبىلىم گرانتتارىنا 300 ملن تەڭگە ءبولدى. بيىلعى وقۋ جىلىندا 12 ستۋدەنت «حالىق» قورىنىڭ 100% گرانتىمەن وقىدى، ونىڭ التاۋى حالىقارالىق «ميراس» مەكتەبىنىڭ IB ديپلومىن الىپ، الەمنىڭ جەتەكشى ۋنيۆەرسيتەتتەرىنە وقۋعا ءتۇستى.
«بالالار – ەلىمىزدىڭ بولاشاعى، ولاردىڭ قاۋىپسىزدىگى مەن ءال-اۋقاتىن ارتتىرۋ ءبىزدىڭ ماقساتىمىز. ءبىز، ەرەسەكتەر، ءاربىر بالانىڭ ءوز الەۋەتىن اشۋعا جانە بۇكىل قازاق قوعامىنىڭ دامۋىنا ۇلەس قوسۋعا مۇمكىندىگى بار الەم قۇرا الامىز»، — دەدى «حالىق» قورىنىڭ باسقارۋشى ديرەكتورى ناريمان ءابىلشايىقوۆ.
بيىلعى جىلى بالالاردى قورعاۋ كۇنىنە وراي «حالىق» قورى پەدياتريا جانە بالالار حيرۋرگياسى عىلىمي ورتالىعىنىڭ 17 ويىن بولمەسىن ويىنشىقتارمەن قامتاماسىز ەتتى. مۇندا جىل سايىن قازاقستاننىڭ بارلىق ايماقتارىنان اۋىر دياگنوز قويىلعان 5 مىڭنان استام بالا جاتقىزىلادى.
سونداي-اق، «حالىق» قورىنىڭ «اۋىل فۋتبول» جوباسىنا ەنگەن مۇمكىندىگى شەكتەۋلى بالالار كومانداسىن بالالار كۇنىمەن قۇتتىقتاپ، 15 بالاعا شاعىن سىيلىق تابىستالدى. ورتالىقتا ءارتۇرلى مۇمكىندىگى شەكتەۋلى بالالاردىڭ الەۋمەتتەنۋ جانە دەنە شىنىقتىرۋ داعدىلارى قالىپتاسادى.
بالالارعا ارنالعان اندەر ارقىلى قازاق ءتىلىن ۇيرەنۋگە ارنالعان وقۋ-ادىستەمەلىك قۇرال شىعارۋ جوباسىن قولدادىق. وسى جوبا اياسىندا كومپوزيتور، ءانشى، پەداگوگ جانە پروفەسسور نازىمبەك دۇكەنبايدىڭ بالالارعا ارنالعان كىتابىنىڭ شىعۋىنا قولداۋ كورسەتتىك
«حالىق» قايىرىمدىلىق قورى ءبىلىم بەرۋدى، سپورتتى جانە مادەنيەتتى، ونىڭ ىشىندە تولىق ەمەس جانە كوپ بالالى وتباسىندا تاربيەلەنىپ جاتقان بالالاردى دامىتۋ ارقىلى الەۋمەتتىك كومەك پەن بىلىمگە تەڭ قولجەتىمدىلىكتى قامتاماسىز ەتۋ ميسسياسىن جالعاستىرۋعا نيەتتى.
