رەسەيدىڭ ەتنوۇلتتىق ستراتەگيالار اگەنتتىگىنىڭ ديرەكتورى الەكساندر كوبرينسكييدىڭ پىكىرىنشە، كرەمل ءۇشىن ءقازىر يمانعالي تاسماعامبەتوۆتىڭ كانديداتۋراسى قولايلىراق كورىنەدى. ويتكەنى، ول سوڭعى كەزدەرى رەسەيدەن ىرگەسىن اۋلاق سالا باستاعان توقايەۆقا قاراعاندا، تاسماعامبەتوۆتى الدەقايدا رەسەيشىل ساياساتكەر دەپ ەسەپتەيدى. ساراپشى قازاقستاندا قاراشا ايىندا وتەتىن سايلاۋعا بايلانىستى NG («نوۆايا گازەتا») باسىلىمىنا وسىنداي پىكىر بىلدىرگەن.
ونىڭ ايتۋىنشا، توقايەۆقا باسەكەلەس بولا التىن جالعىز ادام – يمانعالي تاسماعامبەتوۆ. ونىڭ مەملەكەتتىك جانە ديپلوماتيالىق قىزمەتتەگى ۇلكەن تاجىريبەسىنە، قازاقستاندا تانىمال ءارى سىيلى ەكەنىنە، باستىسى، قوعامنىڭ تەرىس قاباق تانىتپايتىنا ەرەكشە توقتالىپتى.
دەسە دە، ساراپشى كرەملدىڭ بۇل سايلاۋعا تاسماعامبەتوۆتى قولىنان جەتەكتەپ كەلىپ، «ءبىزدىڭ ۇكىلەگەن ۇمىتكەرىمىز – وسى» دەپ دوداعا قوسۋى نەعايبىل ەكەنىن جاسىرماعان.
«ءبىراق ونىڭ (تاسماعامبەتوۆ – رەد.) پرەزيدەنتتىك سايلاۋعا قاتىساتىنى، كرەملدىڭ بۇل سايلاۋعا ىقپال ەتەتىنى – ءوز الدىنا بولەك ماسەلە»، – دەپ تۇيىندەيدى رەسەيلىك ساراپشى.
راس، قازاقستاننىڭ رەسەيدەگى بۇرىنعى ەلشىسى دە ازىرگە سايلاۋعا تۇسەتىن نيەتىن جاريا ەتكەن جوق. نازاربايەۆ ءداۋىرىنىڭ اياق تۇسىندا قىزمەتىنەن كەتكەننەن بەرى، ساياسات ساحناسىنا شىققان ەمەس. ساق ءجۇردى. ساياق ءجۇردى. دەسە دە، سولتۇستىك كورشى ەلدىڭ بيزنەس، ساياسي قايراتكەرلەرىمەن قارىم-قاتىناسى ورناتىپ، ىڭ-شىڭسىز جان-جاعىن بۇتىندەگەنى قۇپيا ەمەس.
ك.ءماسىموۆ پەن ي.تاسماعامبەتوۆ. فوتو: عالامتوردان
الەكساندر كوبرينسكيي تاسماعامبەتوۆتى كوككە كوتەرىپ، توقايەۆتى تومەندەتكەنىمەن، قازىرگى پرەزيدەنتتىڭ قايتا سايلانۋىنا ەشقانداي ءقاۋىپ جوق ەكەنىن مويىندايدى. ويتكەنى، وليگارحتاردىڭ اۋلەتتەرى، اقوردانىڭ قارسىلاستارى ورتاق كانديدات ۇسىنا المايدى. دەمەك، توقايەۆ شاپپاي بايگە الماق.
تاسماعامبەتوۆتىڭ كىمگە بولسا دا، ادۋىندى قارسىلاس بولا الاتىنى انىق. نازاربايەۆتىڭ كومانداسىنان شەتتەتىلگەنىنە دە وسى ەرەكشە حاريزماسى سەبەپ بولدى. تىنىش جاتسا دا، پرەزيدەنت اكىمشىلىگىن تاسماعامبەتوۆتىڭ تۇلعاسى ابىگەرگە سالارى انىق. ال كرەمل ساقا ەتىپ سايلاپ، ويىنعا سالۋ نيەتىن جىلت ەتكىزسە، وندا مۇنىڭ ءجونى مۇلدە بولەك.
ماسەلەن، كەيبىر اقوردامەن ەتەنە تەلەگرام ارنالار «رەسەيدىڭ تاسماعامبەتوۆتى قازاقستاننىڭ ۇقشۇ-داعى وكىلى رەتىندە كورۋدى قالاپ وتىرعانىن» مەڭزەپ، سىبىس تاراتىپ وتىر.
ال تاسماعامبەتوۆ وسىعان دەيىن ءوزىن ءقازاقتىلدى، ۇلتجاندى ءارى ىسكەر ازامات رەتىندە يميدج قالىپتاستىردى. سوندىقتان ونى رەسەيشىل ساياساتكەر رەتىندە كوزگە ەلەستەتۋ قيىنداۋ. ساياساتتان دا سىرت قالدى. ەسىمى ەل جادىنان كومەسكەلەنىپ بارادى. ارينە، كرەمل ءباس تىكسە، ءبارى وزگەرۋى مۇمكىن.
راسىمەن دە، كرەمل توقايەۆتان كوڭىلى قالىپ، تاسماعامبەتوۆكە يەك ارتىپ وتىر ما؟ الدە، ايتقانىنا كونىپ، ايداۋىنا جۇرمەگەن اقورداعا قىر كورسەتكەنى مە؟ ايتەۋىر، سوڭعى كەزدەرى ءوزى كوپشىلىكتىڭ الدىنا شىقپاسا دا، سايلاۋ جاقىنداعان سايىن تاسماعامبەتوۆتىڭ ەسىمى ءجيى اۋىزعا ىلىگىپ ءجۇر.
ەندى مىنە، رەسەيلىك باق-تار وتقا ماي قۇيا باستاعانداي.
https://nege.kz/
