ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"جوعالتىپ العاندارىمىزدى ىزدەيتىن ۋاقىت كەلدى ەمەس پە؟" - ءماجىلىس دەپۋتاتى

12 قازان 2022 53
ءماجىلىس دەپۋتاتى ەدىل جاڭبىرشين ەكىنشى دۇنيەجۇزىلىك سوعىستا قازا تاپقاندار تۋرالى مالىمەتتى سيفرلاندىرۋ ماسەلەسىن كوتەردى.

ول دەپۋتاتتىق ساۋالىن پرەمەر-مينيستر ءاليحان سمايىلوۆقا جولدادى.

«30 جىل تاۋەلسىزدىگىمىز كەزىندە ۇلى وتان سوعىسىنا قاتىسقان قازاقستاندىقتاردىڭ تاعدىرى تۋرالى سەنىمدى اقپاراتتى الاتىن ۇلتتىق سيفرلىق پلاتفورما، ياعني تولىق ەلەكتروندى دەرەكقور ءالى كۇنگە دەيىن جاساقتالعان جوق. مايدانگەرلەر تۋرالى تاريحي جادىنى ساقتاپ قالۋ ماسەلەسى وسى كۇنگە دەيىن اشىق كۇيىندە قالىپ وتىر.

ساراپشىلاردىڭ پايىمداۋىنشا، قازاقستاندىقتاردىڭ تاعدىرىن ىزدەۋشى ۇرپاقتارىنىڭ سانى 2 ميلليون ادامنان اسادى. ءقازىر قازاقستان ازاماتتارى، تاريحشىلارى جانە گەلوگتارى مايدانگەرلەردى ىزدەۋ ءۇشىن رەسەيلىك «مەموريال»، «پاميات نارودا» سياقتى ەلەكتروندى دەرەكقورلاردى پايدالانادى. ءبىراق بۇلاردىڭ ىشىنەن ناقتى قازاقستاندىقتار تۋرالى دەرەكتەردى تابۋ وتە قيىن»،

- دەدى جاڭبىرشين.

دەپۋتات رەسەيلىك دەرەكقورداعى قۇجاتتار تەك ورىس تىلىندە ۇسىنىلعانىن دا ايتىپ ءوتتى.

«ول جەردە قازاقستان رەسپۋبليكاسىنىڭ جەرگىلىكتى قورعانىس دەپارتامەنتتەرىندە ساقتالعان وفيسەرلەر مەن جاۋىنگەرلەردىڭ باستاپقى شاقىرۋ دەرەكتەرى جوق. قۇجاتتار سيفرلانباعان»،

- دەدى دەپۋتات.

ونىڭ سوزىنشە، قولدا بار قۇجاتتار دا، رەسەي مۇراعاتىندا قۇجاتتار دا توزىپ جاتىر.

دەپۋتات قازا بولعاندار تۋرالى مالىمەتتەردى جيناپ، سيفرلاندىرۋ ماسەلەسىمەن ۇكىمەتتىك ەمەس ۇيىمداردىڭ اينالىسىپ جاتقانىنان دا توقتالدى. ونىڭ سوزىنشە، ەلىمىزدە «اتامنىڭ اماناتى» قوعامدىق ۇيىمىنىڭ ارقاسىندا 1 500 قازاقستاندىق جاۋىنگەردىڭ جەرلەنگەن جەرى، مايدانداعى تاعدىرى، جاۋىنگەرلىك جولى انىقتالعان.

«ۇمىتىلعاندارىمىزدى جاڭعىرتاتىن، جوعالتىپ العاندارىمىزدى ىزدەيتىن ۋاقىت كەلدى ەمەس پە؟ قازىرگى جاستارىمىز بەن جاۋىنگەرلەرىمىزدى وتانسۇيگىشتىككە، تاريحىمىزدى قۇرمەتتەۋگە باۋليمىز دەيمىز. نەگە ۇكىمەت وسى ماڭىزدى ماسەلەمەن جۇيەلى تۇردە اينالىسپايدى؟ نەگە جان-جاقتى قولداۋ كورسەتپەيدى؟»،

- دەدى دەپۋتات.

ءماجىلىس دەپۋتاتى ۇكىمەت باسشىسى ءاليحان سمايىلوۆقا بىرنەشە ۇسىنىس ايتتى:

  • جەرگىلىكتى جەرلەردەگى بارلىق مەملەكەتتىك ورگاندار مەن مۇراعاتتاردا ساقتالعان مايدانگەرلەردىڭ قۇجاتتارىن سيفرلاندىرىپ، وعان قاجەتتى قارجى قاراستىرۋ؛

  • عىلىمي جۇمىستاردى كوپ جىلدىق تاجىريبەسى بار، جۇيەلى جۇمىستار اتقارىپ جۇرگەن قوعامدىق ۇيىمدارعا تاپسىرۋ؛

  • رەسەي مۇراعاتتارىندا قازاقستاندىقتاردىڭ دەرەكتەرىن سيفرلاندىرىپ، قازاقستانعا جەتكىزۋدى تەز ارادا قولعا الۋ.


«2025 جىلى ميلليونداعان ادامداردىڭ ءومىرىن قيعان، تاعدىرىن تالقانداعان ەكىنشى دۇنيەجۇزىلىك سوعىستىڭ اياقتالعانىنا 80 جىل تولادى. قازاقستان جەرىندە ۇرىستار جۇرمەسە دە، ەلىمىز بۇل قاسىرەتتى سوعىستان تىس قالعان جوق. اسكەرگە 1 جارىم ميلليونداي ادام شاقىرىلدى، ونىڭ 600 مىڭنان استامى ۇرىس دالاسىندا قالدى. قانشاما مايدانگەر مۇگەدەك بولىپ ورالدى. 271 مىڭ ادام ءىز-تۇسسىز جوعالىپ كەتتى. مايدانگەرلەر مەن تىل ەڭبەكشىلەرىنىڭ ەرلىگىن ارتىنداعى ۇرپاعى ەشقاشان ۇمىتپاۋعا ءتيىس. ويتكەنى ولار ەلىمىزدىڭ جارقىن بولاشاعى ءۇشىن ۇرىستا قان توكتى، ماڭداي تەرىن توگىپ، ەڭبەكتەندى»،

- دەدى جاڭبىرشين ءماجىلىس وتىرىسىندا.
بۇل ماقالا تۋرالى نە ويلايسىز؟