بۇل تۋرالى پارلامەنت ءماجىلىسىنىڭ جالپى وتىرىسىندا دەپۋتات ەرلان سايىروۆ پرەمەر-مينيستردىڭ ورىنباسارى ەرالى توعجانوۆقا قازاقستاننىڭ باستى الەۋمەتتىك پروبلەماسىنىڭ بىرەگەيى – حالىقتىڭ باسىم بولىگىنىڭ كەدەيلىگى تۋرالى ماسەلەنى كوتەردى.
«دۇنيەجۇزىلىك بانك الەمدەگى كەدەيلىكتىڭ ەكى شەگىن قاراستىرعان: تابىسى ورتاشادان تومەن ەلدەر ءۇشىن كۇنىنە ءبىر ادامعا 3،2 اقش دوللارى، تابىسى ورتاشادان جوعارى ەلدەر ءۇشىن 5،5 اقش دوللارى. ال قازاقستاندا ەڭ تومەنگى كۇنكورىس دەڭگەيى 2،8 دوللاردى قۇرايدى، رەسەيدە كۇنىنە 6 دوللار. ەڭ تومەنگى كۇنكورىس دەڭگەيى وتە تومەن بولعاننىڭ وزىندە 2021 جىلى تابىسى كۇنكورىس دەڭگەيىنەن تومەن ادامدار سانى رەسمي تۇردە 998 مىڭ ادام بولدى. ال بەيرەسمي ساراپشىلار بۇل كورسەتكىشتىڭ 1،5 ملن، ءتىپتى ودان دا جوعارى ەكەندىگىن ايتادى»، - دەيدى دەپۋتات.
ونىڭ سوزىنشە، ىشكى جالپى ءونىمنىڭ ەسەلەپ وسۋىنە قاراماستان قازاقستان ونداعان جىلدار بويى، كەدەيلىك شەگىن كوتەرمەي كەلەدى. بۇگىندە قازاقستان كۇنكورىس دەڭگەيى الەمدەگى ەڭ تومەن ەلدەردىڭ ءبىرى جانە نيگەريا، انگولا، ۆەنەسۋەلا، گابون سياقتى ەلدەردىڭ قاتارىندا تۇر. ال ەۋروپالىق ەلدەردە كەدەيلىك ورتاشا تابىستىڭ 60% دەڭگەيىندە بەلگىلەنەدى.
«سونىمەن بىرگە، پاندەميا باستالعاننان بەرى تۇرمىسى تومەن ءۇي شارۋاشىلىقتارىنىڭ قارجىسىنا نۇقسان كەلتىرەتىن ينفلياسيانىڭ وسۋىنە بايلانىستى الەۋمەتتىك تولەمدەردىڭ تيىمدىلىگى تومەندەدى. مىسالى، قازاقستاندا حالىقتىڭ ەڭ از قامتىلعان 40 پايىزى ءوز بيۋدجەتىنىڭ 59 پايىزىن ازىق-تۇلىك ونىمدەرىنە جۇمسايدى. كەي كەزدەرى بۇل كورسەتكىش ودان دا جوعارى. ەلىمىزدە ازاماتتاردىڭ تومەن الەۋمەتتىك جاعدايىنىڭ ەكى ينديكاتورى بار – ەڭ تومەنگى كۇنكورىس شەگى جانە كەدەيلىك شەگى. كەدەيلىك شەگى، ەڭ تومەنگى كۇكورىس شەگىنىڭ، ياعني 36 مىڭ تەڭگەنىڭ 70 پايىزىن قۇرايدى»، - دەيدى دەپۋتات.
