استانادا ءوتىپ جاتقان «قازاقستانداعى اتوم ەنەرگەتيكاسىنىڭ دامۋ پەرسپەكتيۆالارى» فورۋمىنىڭ ەكىنشى پانەلدىك سەسسياسىندا سپيكەرلەر اتوم ەنەرگەتيكاسىنىڭ پايداسى تۋرالى باياندادى، دەپ حابارلايدى قازاقپارات.
اتوم ەلەكتر ەنەرگياسىنىڭ تۇراقتى كوزىن قامتاماسىز ەتۋدىڭ جولى عانا ەمەس، سونىمەن قاتار، ەكونوميكانىڭ ساباقتاس سالالارىن دامىتۋدىڭ قۋاتتى كاتاليزاتورى ەكەنىن اتاپ ءوتتى.
اتوم ەلەكتر ستانساسى سياقتى اۋقىمدى جانە ءبىلىمدى قاجەت ەتەتىن جوبانى جۇزەگە اسىرۋ ەنەرگەتيكانىڭ، قۇرىلىستىڭ، عىلىمنىڭ جانە تاعى باسقا زاماناۋي تەحنولوگيالار سياقتى سالالاردىڭ دامۋىنا سەپتىگى تيەتىنى ايتىلدى.
«قازاقستاندا اتوم ەلەكتر ستانساسىن سالۋ ماسەلەسى تۇرعىندار اراسىندا ءبىراز كۇمان تۋدىرادى. كوبى ونىڭ ارتىقشىلىقتارىن بىلە بەرمەيدى. وكىنىشكە قاراي، حالىق اتوم ەنەرگياسىن ەنگىزۋدىڭ ناقتى ەكونوميكالىق پايداسى جونىندە حابارسىز. ەلىمىزدىڭ كەمەل كەلەشەگىن ويلاساق، ەنەرگيا تاپشىلىعى مەن ەنەرگياعا تاۋەلدىلىكتەن ارىلۋ ماڭىزدى. قيسىندى قادامداردىڭ ءبىرى — اتوم ەلەكتر ستانساسىن سالۋ»، — دەدى تالقى بارىسىندا قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازييەۆا.
سپيكەرلەر اتوم ەلەكتر ستانسالارىنىڭ قۇرىلىسىنا قارسى شىققان جاعدايدا ەنەرگەتيكا سالاسىندا ۇلكەن ناتيجەگە جەتكىزۋ قيىن ەكەنىن جەتكىزدى.
«ءوز باسىم ناقتى شەشىمگە كەلدىم: اەس حالىققا ەشقانداي ءقاۋىپ توندىرمەيدى. ول قورشاعان ورتاعا دا زيانى جوق. بۇعان الماتى مەن كۋرچاتوۆتاعى عىلىمي-زەرتتەۋ رەاكتورلارىنىڭ تاجىريبەسى دالەل»، — دەپ اتاپ ءوتتى فورۋم مودەراتورى، «اتامەكەن» ۇكپ باسقارۋشى ديرەكتورى، قازاقستان رەسپۋبليكاسىنىڭ ەڭبەك سىڭىرگەن ەنەرگەتيگى جاقىپ حايرۋشيەۆ.
