مارقۇمداردىڭ تۋىستارى كىمنىڭ قولىنان قازا تاپقانىن انىقتاۋدى تالاپ ەتتى.
الاڭعا ەكى جىل بۇرىنعى قاندى وقيعا كەزىندە قازا بولعانداردىڭ تۋعان-تۋىستارى مەن ازاپتالعان ازاماتتار دا كەلدى.
قاڭتار وقيعاسى وسىدان ەكى جىل بۇرىن باستالىپ، جاپپاي نارازىلىق بىرنەشە قالانى شارپىپ، 238 ادامنىڭ ولىمىمەن اياقتالعان.
ونىڭ ىشىندە 19 مارقۇم كۇش قۇرىلىمدارىنىڭ قىزمەتكەرلەرى. كەيىن ادام قۇقىقتارى جونىندەگى ۋاكىل بولعان ەلميرا ءازىموۆا تەرگەۋ بارىسىندا ازاپتاۋدان تاعى التى ادام كوز جۇمعانىن حابارلاعان ەدى.
قاڭتار وقيعاسىنان كەيىن مىڭنان اسا ادام ۇستالىپ، ولاردىڭ كوبى پرەزيدەنت راقىمشىلىعىمەن بوستاندىققا شىققان. كارىم ءماسىموۆ، مۇرات بەكتانوۆ باستاعان بىرنەشە شەنەۋنىككە ۇكىم دە شىعىپ قويعان. قايرات قۇدايبەرگەن، ارمان جۇماگەلدييەۆ بويىنشا سوت ىستەرى ءالى اياقتالعان جوق.
بۇگىن الماتىداعى الاڭعا جينالعان ازاماتتار قاندى وقيعا كەزىندە وپات بولعان ازاماتتاردىڭ ەسىمى جازىلعان پلاكات الىپ شىقتى. قۇربان بولعانداردىڭ تۋعان-تۋىستارى ءالى دە تەرگەۋدىڭ جۇرگىزىلۋىن، تۋىستارى كىمنىڭ قولىنان قازا تاپقانىن انىقتاۋدى تالاپ ەتتى.
جيىنعا بەلگىلى قوعام بەلسەندىسى، جۋرناليست رىسبەك سارسەنباي، قاڭتار وقيعاسى كەزىندە اۋىر جاراقات العان ەرمەك ابدىرەشوۆ ءسوز سويلەدى.
رىسبەك سارسەنباي «دۋمان مۇحاممەدكارىم، ايگەرىم تىلەۋجان، مارات جىلانبايەۆ، قالاس نۇرپەيىسوۆ پەن باسقا دا بەلسەندىلەر قاڭتار اقيقاتىن، ءوز پىكىرىن ايتقانى ءۇشىن قاماۋدا وتىرعانىن» ايتىپ، ولارعا بوستاندىق بەرۋدى تالاپ ەتۋگە شاقىردى. الاڭعا جينالعان ازاماتتار «ءبىز – تەرروريست ەمەسپىز» دەپ ۇرانداتتى.
فوتو qaz365.kz
