اقتاۋ قالاسىندا 14 ىقشام اۋدانىنداعى پاتەردەن ايەل ادامنىڭ ءمايىتى تابىلدى. بۇل تۋرالى پوليسيا دەپارتامەنتى مالىمدەدى. جەرگىلىكتى Lada.kz باسىلىمىنا مارقۇم ايەلدىڭ كورشىلەرى بولعان جايتتى تولىعىمەن بايانداپ بەرگەن.
قايتىس بولعان ايەلدىڭ ەسىمى - پاراحات. 1972 جىلى تۋعان كەلىنشەك. ول 9-قاباتتى ءۇيدىڭ 2ء-شى قاباتىندا تۇرعان. كورشىلەرىنىڭ ايتۋىنشا، ولىمىنە كۇدىكتى دەپ تانىلعان ەر ادام مارقۇمنىڭ سۇيىكتىسى بولعان سەكىلدى.
كورشىلەرىنىڭ ايتۋىنشا، ايەلدى پىشاقتاپ ولتىرگەن، كەيىن كۇدىكتى پاتەردى ورتەپ جىبەرمەك بولعان.
ساعات تاڭعى بەستە بارلىعىمىز 10 مينۋتقا دالاعا شىقتىق. بۇل كەزدە پوليسيا قىزمەتكەرلەرى مەن ءورت سوندىرۋشىلەر كەلگەن بولاتىن. كۇدىكتىنى 9-قاباتتان ۇستادى. ءورت سوندىرۋشىلەردى 2-قاباتتاعى كورشىلەر شاقىرعان،-دەدى كورشىسى.
پوليسيا دەپارتامەنتى جاعدايعا قاتىستى ەگجەي-تەگجەيلى تۇسىنىكتەمە بەردى.
«ادام ءولتىرۋ دەرەگى بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. تەرگەۋ مۇددەسى سايكەس باسقا مالىمەتتەر جاريالانبايدى»، - دەپ حابارلادى ۆەدومستۆونىڭ باسپا ءسوز قىزمەتى.
