باتىس قازاقستان وبلىسىنىڭ اكىمدىگى 15 ساۋىردە ورال قالاسىنىڭ تۇرعىندارىنا ەسكەرتۋ جاسادى.
بارشاڭىزعا بەلگىلى، قالادا سۋ تاسقىنى قاۋپىنە وراي كۇردەلى جاعداي قالىپتاسىپ وتىر. مامانداردىڭ ايتۋىنشا، رەسەي فەدەراسياسىنان سۋدىڭ مول كولەمى 2-3 كۇندە قالامىزعا جەتەدى. ءقاۋىپتى دەڭگەي 8،5 مەتر بولسا، ءقازىر جايىقتىڭ دەڭگەيى 8 مەترگە جۋىقتادى. سۋ تاسقىنىنا قارسى جۇمىسقا جەرگىلىكتى اتقارۋشى ورگاننىڭ جانە توتەنشە جاعداي قىزمەتىنىڭ بارلىق رەسۋرسى تارتىلدى. ءقازىر 350 ارنايى تەحنيكا، 2000-عا جۋىق ادام تاسقىنعا توسقاۋىل قويۋعا جۇمىلدىرىلعان. سونداي-اق وزگە وڭىرلەردەن، وبلىسىمىزدىڭ اۋداندارىنان كەلگەن اسكەري قىزمەتشىلەر، توتەنشەلىكتەر جانە ەرىكتىلەر بۇل جۇمىسقا بەلسەنە اتسالىسىپ جاتىر، - دەلىنگەن حابارلامادا.
اكىمدىك جايىق جايىلىمىنداعى ساياجايلاردىڭ، سۋ باسۋ ءقاۋپى جوعارى كۋرەني، ستاريسا، كومينتەرن اۋداندارىنىڭ تۇرعىندارى ەۆاكۋاسيا جاساۋ قاجەت ەكەنىن ەسكەرتتى.
ەڭ باستىسى - ازاماتتاردىڭ اماندىعى. سوندىقتان جايىق جايىلىمىنداعى ساياجايلاردىڭ، سۋ باسۋ ءقاۋپى جوعارى كۋرەني، ستاريسا، كومينتەرن اۋداندارىنىڭ تۇرعىندارى ەۆاكۋاسيا جاساۋ قاجەت. سۋدىڭ مول كولەمى كەز-كەلگەن ۋاقىتتا جەتىپ، ءۇيىڭىزدى سۋ باسۋى مۇمكىن. ءوزىڭىزدىڭ جانە جاقىن ادامدارىڭىزدىڭ ءومىرىن قاۋىپكە تىكپەي، شۇعىل تۇردە تۋما-تۋىس، دوستارىڭىزدىڭ ۇيىنە ورنالاسىڭىز. ۋاقىتشا باراتىن ءۇي بولماسا، قالادا ەۆاكۋاسيالىق پۋنكتتەر جاساقتالعان. ولار تۇرعىنداردى كۇنى-تۇنى ۇزدىكسىز قابىلدايدى. سۇراقتار بويىنشا قالالىق شتابقا 24-05-70 جانە 24-01-94 تەلەفون نومىرلەرى ارقىلى حابارلاسۋعا بولادى. ەۆاكۋاسيانى قازىردەن باستاڭىز!، - دەلىنگەن اكىمدىك حابارلاماسىندا.
