قىرعىزستاننىڭ توتەنشە جاعدايلار مينيسترلىگى سۋ تاسقىنىنان زارداپ شەككەن قازاقستاندىقتارعا كومەك رەتىندە «جاردەم كەرۋەنى» اتتى گۋمانيتارلىق جۇكتىڭ ەكىنشى پارتياسىن جونەلتكەنىن حابارلادى، دەپ جازدى Alash.KZ ۇلتتىق پورتالى 24kg سايتىنا سىلتەمە كورسەتە وتىرىپ.
اقپاراتقا سايكەس، ەكىنشى گۋمانيتارلىق جۇك قىرعىزستاندا وندىرىلگەن ءسۇت ونىمدەرىنەن تۇرادى. اتاپ ايتقاندا،10 مىڭ ليتر ايران، 14،2 مىڭ قوراپ قايماق، 10 مىڭ ليتر سارى ماي مەن وسىمدىك مايى، 20 توننا گوللاند ىرىمشىگى، 80 توننا مايسىزداندىرىلعان قۇرعاق ءسۇت.
«جۇك قىرعىز حالقىنىڭ كۇشىمەن جينالدى، پرەزيدەنتتىڭ رەزەرۆتىك قورىنان قوسىمشا قاراجات ءبولىندى» دەپ حابارلادى توتەنشە جاعدايلار مينيسترلىگى.
ەستەرىڭىزدە بولسا، ءساۋىر ايىنىڭ باسىندا جامبىل وبلىسىنا قىرعىزستاننان العاشقى گۋمانيتارلىق جۇك – 300 توننا جۇك تيەگەن 15 جۇك كولىگى كەلدى. جۇك قازاقستاننىڭ ءتورت وبلىسىنا ءبولىندى.
بۇعان دەيىن قىرعىزستان مينيسترلەر كابينەتىنىڭ ءتوراعاسى اقىلبەك جاپاروۆ بىشكەكتەگى جەو اپاتىنان كەيىن قازاقستان قىرعىزستانعا كومەك قولىن سوزعانىن اتاپ وتكەن بولاتىن. ول كەزدە قىرعىزستانعا ديزەلدىك وتىن تۇرىندەگى 2 مىڭ توننا گۋمانيتارلىق كومەك جىبەرىلدى.
«بۇل جاعدايدا ءبىز ولارعا ءتىپتى ولار سۇراماسا دا گۋمانيتارلىق كومەك جىبەرەمىز»، - دەدى جاپاروۆ قازاقستانداعى سۋ تاسقىنى جاعدايىنا توقتالىپ. تۇركيا دا قازاقستانعا كومەك كورسەتۋگە دايىن ەكەنىن ءبىلدىردى. بۇل تۇرعىدا تۇركيا سىرتقى ىستەر مينيسترلىگى ءتيىستى مالىمدەمە جاسادى.
