ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ۋكراينا دروندارى رەسەيدى كورشىلەرىنەن بەنزين سۇراۋعا ماجبۇرلەي باستادى

12 ءساۋىر 2024 319

رەسەي قازاقستاننان 100 مىڭ توننا بەنزين بەرۋگە دايىن تۇرۋدى سۇرادى. سەبەبى سولتۇستىكتەگى كورشىدە ۋكراينانىڭ ۇشقىشسىز ۇشاقتارىنىڭ شابۋىلدارىنان جانە مۇناي وڭدەۋ زاۋىتتارىنىڭ توقتاپ قالۋ قاۋپىنەن جانارماي تاپشىلىعى تۋىنداۋى عاجاپ ەمەس. بۇنى "رەيتەر" اگەنتتىگى وسى سالامەن ەتەنە تانىس ءۇش دەرەككوزگە سۇيەنىپ حابارلادى.

دەرەككوزدەردىڭ ءبىرى رەسەي ءۇشىن رەزەرۆتەردى پايدالانۋ تۋرالى كەلىسىم جاسالىپ قويعانىن ايتقان. الايدا، ق ر ەنەرگەتيكا ءمينيسترىنىڭ كەڭەسشىسى شىڭعىس ءىلياسوۆ رەسەي تاراپىنان مۇنداي سۇرانىس تۇسپەگەنىن مالىمدەگەن.

رەسەي ەنەرگەتيكا مينيسترلىگى بولسا، بۇل جاعدايعا بايلانىستى ازىرگە تۇسىنىكتەمە بەرمەي وتىر.

ال بەلارۋس ءقازىردىڭ وزىندە رەسەيگە بەنزين جەتكىزۋگە كومەكتەسۋگە كەلىستى.

ۇشقىشسىز ۇشاقتاردىڭ شابۋىلدارى ناۋرىز ايىنىڭ اياعىنداعى جاعداي بويىنشا رەسەيدىڭ مۇناي وڭدەۋ قۋاتتىلىعىنىڭ شامامەن 14 پايىزىن ىستەن شىعارىپتى. دەگەنمەن، رف بيلىگى ىشكى جانارماي نارىعىنداعى جاعدايدىڭ تۇراقتى جانە قورلاردىڭ جەتكىلىكتى ەكەنىن حابارلادى.

رەسەي ادەتتە جانارمايدىڭ تازا ەكسپورتتاۋشىسى جانە حالىقارالىق نارىقتارعا ءىرى جەتكىزۋشى سانالادى. ءبىراق ونىڭ مۇناي وڭدەۋ زاۋىتتارىنىڭ ىستەن شىعۋى رەسەي مۇناي كومپانيالارىن وتىندى يمپورتتاۋعا ءماجبۇر ەتىپ وتىر.

ماسكەۋ 1 ناۋرىزدان باستاپ جانارماي تاپشىلىعىنىڭ الدىن الۋ ءۇشىن التى ايعا بەنزين ەكسپورتىنا تىيىم سالدى. دەگەنمەن بۇل تىيىم ماسكەۋ جەتەكشىلىك ەتەتىن ەۋرازيالىق ەكونوميكالىق وداققا، سونىڭ ىشىندە قازاقستانعا، جانە دە وسى ينتەگراسيالىق بلوكتان تىس موڭعوليا سياقتى ەلدەرگە قاتىستى ەمەس.

دەگەنمەن، ترەيدەرلەر رەسەيدەگى جاعداي ۋشىعىپ كەتسە، وسىناۋ تىيىمنىڭ اۋقىمى كەڭەيۋى مۇمكىن ەكەنىن ايتادى.

وتكەن اپتادا ورالداعى ورسك مۇناي وڭدەۋ زاۋىتى جاپپاي سۋ تاسقىنى سالدارىنان ءوندىرىستى توقتاتتى.

الەمدەگى تەڭىزگە شىعا المايتىن ەڭ ۇلكەن مەملەكەت - قازاقستان دا گۋمانيتارلىق ماقساتتاردى ايتپاعاندا، جىل سوڭىنا دەيىن جانارماي ەكسپورتىنا شەكتەۋ قويىپ وتىر.

اقپارات كوزدەرىنىڭ مالىمەتىنشە، 5 ساۋىردەگى جاعداي بويىنشا قازاقستانداعى اي-92 بەنزينىنىڭ قورى 307،7 مىڭ توننانى، اي-95 ماركاسىنىڭ قورى 58 مىڭ توننانى، ال ديزەلدىك وتىن قورى 435 300 توننانى، اۆياكەروسين قورى 101 000 توننانى قۇراعان.

بۇل ماقالا تۋرالى نە ويلايسىز؟