ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستاندا 20 سۋ قويماسى سالىنباق

12 ءساۋىر 2024 231
ەلدى مەكەندەردى سۋ تاسقىنىنان قورعاۋ جانە تاسقىن سۋىن جيناۋ ماقساتىندا سۋ رەسۋرستارى جانە يرريگاسيا مينيسترلىگى 20 سۋ قويماسىن سالادى، دەپ حابارلايدى alash.kz.

ۆەدومستۆو وكىلدەرىنىڭ مالىمەتىنشە، جاڭا سۋ قويمالارى 11 وبلىستا سالىنادى.

بەس سۋ قويماسىنىڭ قۇرىلىسىن بيىل باستاۋ جوسپارلانىپ وتىر. جاڭا سۋ قويمالارى سۋارمالى جەرلەردىڭ اۋدانىن 250 مىڭ گەكتارعا ۇلعايتۋعا جانە 137 مىڭ تۇرعىنى بار 70 ەلدى مەكەندى سۋ باسۋ ءقاۋپىن ازايتۋعا سەپتىگىن تيگىزەدى.

سونداي-اق ەلىمىزدەگى جۇمىس ىستەپ تۇرعان 15 سۋ قويماسىنا رەكونسترۋكسيا جاسالادى. بۇل 70 مىڭ ادام تۇراتىن 64 ەلدى مەكەندى سۋ باسۋ ءقاۋپىن ازايتۋعا، سونداي-اق 74 مىڭ گەكتار سۋارمالى جەرگە سۋ بەرۋدى جاقسارتۋعا مۇمكىندىك بەرەدى.

سۋ تاسقىنى كەزەڭىنىڭ قورىتىندىسى بويىنشا سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىنا وزگەرىستەر ەنگىزىلەدى. مەملەكەت باسشىسىنىڭ تاپسىرماسىنا سايكەس، تۇجىرىمداماعا سۋ تاسقىنىنىڭ الدىن الۋ جانە ەرىگەن قار سۋىن جيناپ، ونى ودان ءارى اۋىل شارۋاشىلىعىندا جانە باسقا دا ماقساتتارعا پايدالانۋ جونىندە ءىس-شارالار ەنگىزىلەدى.

سۋ قويمالارىنداعى قازىرگى جاعدايعا كەلەتىن بولساق، ءدال وسى ساعاتتا:

قوستاناي وبلىسىندا سۋ تاسقىنىنىڭ بەلسەندى كەزەڭى ءوتىپ، وڭىردەگى ەكى ءىرى سۋ قويماسى 92% سۋ جينادى.

سولتۇستىك قازاقستان وبلىسىنىڭ ەكى ءىرى سۋ قويماسى 100% تولدى. س تاسقىنى جالعاسىپ جاتىر.

باتىس قازاقستان وبلىسىندا 4 ءىرى سۋ قويماسى ورتا ەسەپپەن 70%-عا تولدى. يرەكلى سۋ قويماسىنان جىبەرىلگەن سۋ قازاقستان شەكاراسىنا ازىرگە جەتكەن جوق. بۇل سۋ 15-20 ساۋىردە كەلەدى دەپ كۇتىلىپ وتىر. وبلىستا مينيسترلىكتىڭ جانە وبلىس اكىمدىگىنىڭ ماماندارى بىرلەسىپ سۋ وتكىزۋدى رەتتەۋ بويىنشا جۇمىستى جالعاستىرىپ جاتىر.

شىعىس قازاقستان وبلىسىندا ءۇش ءىرى سۋ قويماسىنىڭ ورتاشا سۋ جيناۋ كولەمى – 84،8%. وڭىردە سۋ تاسقىنى باستالدى، سوندىقتان ەرتىس سۋ قويمالارى بويىنشا سۋ جىبەرىلىپ جاتىر.

اقمولا وبلىسىنداعى ەكى ءىرى سۋ قويماسى 99% سۋ جينادى. وڭىردە سۋ تاسقىنىنىڭ بەلسەندى كەزەڭى ءوتتى، ءبىراق جاباي وزەنىنىڭ رەتتەلمەيتىن اعىنى ارتىپ كەلەدى. سوندىقتان اقمولا وبلىسىنىڭ اتباسار اۋدانىندا سۋ تاسقىنى ءقاۋپى بار. مينيسترلىك، ءوڭىر اكىمدىگى جانە تجد ءقاۋىپتىڭ الدىن الۋ ءۇشىن بەلسەندى جۇمىس ىستەپ جاتىر.

اقتوبە وبلىسىندا ەكى ءىرى سۋ قويماسى 97%-عا تولدى. وڭىردەگى جاعداي تۇراقتى.

قاراعاندى وبلىسىنىڭ 4 ءىرى سۋ قويماسى 100% تولىپ، وبلىستا سۋ تاسقىنىنىڭ بەلسەندى كەزەڭى اياقتالدى. جاعداي تۇراقتى.

قازاقستانداعى بارلىق نىسانداردا تاۋلىك بويى كەزەكشىلىك جانە ساعات سايىن مونيتورينگ جالعاسىپ جاتىر.

بۇل ماقالا تۋرالى نە ويلايسىز؟