ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

اپات بولعان ايماقتاردىڭ وقۋشىلارى جازدا وقيدى

12 ءساۋىر 2024 539

قازاقستاننىڭ سۋ تاسىپ، توتەنشە جاعداي جاريالانعان وڭىرلەرىنىڭ وقۋشىلارى ءبىلىمىن جازدا "جازعى مەكتەپتە" جالعاستىرادى. بۇل جايلى وقۋ-اعارتۋ ۆيسە-مينيسترى ەدىل وسپان ايتىپ بەردى.

باتىس وڭىرلەردە ەۆاكۋاسيالانعان حالىقتىڭ ءبىر بولىگىن مەكتەپتەرگە كوشىرىپ جاتىر.

– وسى جاعداي سول وڭىرلەردىڭ ءبىلىم ساپاسىنا قانشالىقتى تەرىس اسەر ەتەدى؟ سول وڭىرلەردىڭ مەكتەپتەرىندەگى بالالاردىڭ، وقۋشىلاردىڭ ماسەلەسىن قالاي رەتتەدىڭىزدەر؟ – دەپ ەدىل وسپانعا سۇراق قويىلعان.

سۇراققا جاۋاپ بەرگەن ۆيسە-مينيستر وقۋشىلار جاتاقحاناسى بار مەكتەپتەر مەن كوللەدج، ۋنيۆەرسيتەتتەرگە ورنالاستىرىلىپ جاتقانىن ايتتى.

– ەلىمىزدىڭ كوپ وڭىرىندە سۋ تاسقىنى ءجۇرىپ جاتىر. تابيعي سيپاتتاعى اپات. ءبىلىم ساپاسىن ايتار بولساق، 190-عا جۋىق مەكتەپ قاشىقتان وقىتۋعا اۋىستىرىلدى. ول مەكتەپتەردىڭ وقۋشىلارى ءقازىر قاشىقتان وقىتىلىپ جاتىر. ءبىز كوپتەگەن وقۋشىلاردى ءبىلىم يننوۆاسيا، نازاربايەۆ مەكتەپتەرىنىڭ، كوللەدجەر مەن جوعارعى وقۋ ورىندارىنىڭ جاتاقحاناسىنا اۋىستىرىپ، ۋاقىتشا ءبىلىم الۋىن قامتاماسىز ەتىپ جاتىرمىز. وقۋشىلاردىڭ وقۋعا قاجەتتى قۇرال-جابدىقتارىنىڭ بولۋىن دا قاداعالاپ وتىرمىز، – دەيدى ۆيسە-مينيستر.

ەدىل وسپاننىڭ ايتۋىنشا، ەۆاكۋاسيالىق پۋنكتتەردە ورنالاسقان بالالار مۇمكىندىگىنشە، جىل بويى جۇمىس ىستەيتىن لاگەرلەرگە ورنالاستىرىلىپ جاتىر. لاگەرلەردە دە وقۋ پروسەسى ۇيىمداستىرىلعان. 

– بۇدان بولەك، بۇل وڭىرلەردەگى بالالاردىڭ ءبىلىم ساپاسىن ارتتىرۋ ءۇشىن جاز مەزگىلىندە ءدال سول مەكتەپتەرگە ارنالعان جازعى مەكتەپ ۇيىمداستىرىلادى. قاي مەكتەپتەر مەن قاي وقۋشىلار ەكەنى بەلگىلى عوي – جازعى مەكتەپتى سولارعا وتكىزەمىز. ول بۇرىن بولماعان، ءبىراق پاندەميا كەزىندە سونداي تاجىريبە قولدانىلدى، – دەيدى ول.

ەسكە سالا كەتەيىك، ەلدە بىرنەشە كۇننەن بەرى بىرنەشە وڭىردە سۋ تاسىپ، ونداعان اۋداندا توتەنشە جاعداي جاريالاندى. سۋ تاسقىنى ەڭ ۇلكەن ءقاۋىپ تۋعىزىپ وتىرعان وڭىرلەر قاتارىندا اتىراۋ، باتىس قازاقستان، سولتۇستىك قازاقستان، قوستاناي وبلىستارى بار. رەسەيدىڭ ور قالاسىندا دامبىنىڭ جارىلۋى قوسىمشا قيىندىق تۋعىزعان. قۇلسارى قالاسىندا ەڭ كۇردەلى جاعداي تىركەلىپ، ادام شىعىنى تىركەلدى.

پرەمەر-مينيستر، شتاب جەتەكشىسى وسى رەتتە ولجاس بەكتەنوۆ جاۋاپتىلارعا ءبىرقاتار تاپسىرما بەرءدى.

بۇل ماقالا تۋرالى نە ويلايسىز؟