"ديكيي ارمان" دەگەن لاقاپ اتپەن تانىمال ارمان جۇماگەلدييەۆتىڭ قىلمىستىق توبىنىڭ مۇشەلەرى 24 بەيبىت تۇرعىندى ۇرلاپ كەتىپ، كۇشتەپ ۇستاعان. بۇل تۋرالى ارنايى پروكۋرورلار قىزمەتىنىڭ باسشىسى ريزابەك وجاروۆ مالىمدەدى، دەپ حابارلايدى Alash.kz پورتالى Stan.kz سايتىنا سىلتەمە جاساپ.
وجاروۆتىڭ ايتۋىنشا، بۇگىندە ۇيىمداسقان قىلمىستىق توپتىڭ 18 مۇشەسى ۇستالعان. سونداي-اق 21 ادامنىڭ ادام ءولتىرۋ، ۇرلىق، توناۋ باپتارى بويىنشا سوتتىلىعى بار بولىپ شىقتى.
"ولاردىڭ اراسىندا "ديكيي ارمان" دەگەن لاقاپ اتپەن تانىمال ارمان جۇماگەلدييەۆ پەن ونىڭ توبىنىڭ مۇشەلەرى بار. مەن بۇل ايىپتالۋشىعا جەكە توقتالامىن. ونىڭ قارۋلى ادامدارى كەزدەيسوق ءوتىپ بارا جاتقان ادامداردىڭ اراسىنان 24 بەيبىت تۇرعىندى ۇرلاپ كەتىپ، كۇشتەپ ۇستاپ وتىرعان. ولاردى الدىمەن ءبىر جەردەن ەكىنشى جەرگە اپارىپ، ۇرىپ-سوعىپ، ناتيجەسىندە ءبىر ادام قازا تاپتى. سونىمەن قاتار، قاراقشىلار بۇعان دەيىن 12ء-شى قالالىق اۋرۋحانادا قاتتى سوققىعا جىعىلعان پوليسەيدىڭ قىزمەتتىك قارۋىن الىپ كەتكەن"، - دەدى ريزابەك وجاروۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، اتالعان فاكت بويىنشا قىلمىستىق ءىس تەرگەلىپ جاتىر.
"الەۋمەتتىك جەلىلەردە جۇماگەلدييەۆ بوساتىلدى نەمەسە بەلگىسىز جاققا جەتكىزىلدى دەگەن ءتۇرلى بولجامدار مەن جالعان اقپاراتتار تارالىپ جاتىر. ءىس قوسىمشا تەرگەۋ ءۇشىن ارنايى پروكۋرورلارعا جىبەرىلدى. ءبىز ونى ۇقك ۋاقىتشا ۇستاۋ يزولياتورىنا اۋىستىردىق. ول سوندا قاماۋدا وتىر"، - دەپ قوستى ارنايى پروكۋرورلار قىزمەتىنىڭ باسشىسى.
ايتا كەتەيىك، 2 اقپاندا ادۆوكاتتار "ديكيي" ارماننىڭ تەرگەۋ يزولياتورىنان جوعالىپ كەتكەنىن مالىمدەگەن. كەيىن جۇماگەلدييەۆتىڭ باسقا يزولياتورعا اۋىستىرىلعانى انىقتالدى.
ەسكە سالساق، 7 قاڭتاردا الماتىداعى ارنايى وپەراسيا بارىسىندا "ديكيي ارمان" باستاعان ۇيىمداسقان قىلمىستىق توپتىڭ التى مۇشەسى ۇستالعانى حابارلاندى.
قىلمىسكەرلەردەن ءتۇرلى ماركا مەن كاليبرلى 4 جارتىلاي اۆتوماتتى تاپانشا، ءوق-دارى، سۋىق قارۋ مەن بروندالعان كولىك تاركىلەندى. "ديكيي ارماندى" ۇستاۋ ءساتىنىڭ سۋرەتتەرى جاريالاندى. ولارعا قاراعاندا ۇستاۋ وپەراسياسى قوناقۇيلەردىڭ بىرىندە بولعان.
