ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

«بالالارىمىزدى ۇرىپ-سوعىپ، ازاپتاپ جاتىر»: قاڭتارداعى قاقتىعىس كەزىندە ۇستالعان جاسوسپىرىمدەردىڭ انالارى جانايقايلارىن جەتكىزدى

08 اقپان 2022 60

تارازدا قاڭتارداعى قاقتىعىستان سوڭ تەرگەۋگە الىنعانداردىڭ انالارى اراشا سۇرايدى، دەپ حابارلايدى Alash.kz اقپاراتتىق اگەنتتىگى Aibat جاڭالىقتار قىزمەتىنە سىلتەمە جاساپ.


رەسمي مالىمەتكە سايكەس، شاھاردا شەرۋگە شىقتى دەگەن كۇدىكپەن كامەلەتتىك جاسقا تولماعان 8 ءجاسوسپىرىم ءىستى بولىپ جاتىر. ال ونىڭ ءادىل تەرگەلۋىن تالاپ ەتكەن اتا-انالار يزولياتوردا بالالارىن ازاپتاپ جاتقانىن ايتادى.

“17 جاستاعى بالالار ءىىم-نىڭ مىلتىقتارى قاي جاقتا تۇرعانىن قايدان بىلەدى. بىزدە زاڭ جوق”، – دەيدى اتا-انالار.

كامەلەتكە تولماعاندارعا كۇش كورسەتىپ جاتىر دەگەن اتا-انالار بالالارىن ازاپتاۋ ارقىلى قورقىتىپ، قىلمىستىق ىستەرگە قول قويدىرىپ جاتقانىن ايتادى. يرينا سپيرانسكايا 17 جاستاعى ۇلىم كورشىنىڭ سومكەسىن كوتەرىسۋگە كومەك بەرەمىن دەپ 15 جىلعا سوتتالاتىن بولدى دەپ جىلارمان بولىپ وتىر.

“ۇلىم ۆلاديسلاۆ 5 قاڭتار كۇنى ساياباقتا كورشىمدى كورىپ قالىپ، ونىڭ سومكەسىن كوتەرىسكەن. ىشىندە نە بارىن بىلمەگەن. بەس كۇننەن كەيىن پوليسيا ۇلىمدى ۇستاپ اكەتتى. مۇرنىن سىندىرعان، كوزىن كوگەرتكەن. دەنەسىندە اياق ىزدەرى دە بار. ورگانداعىلار ۇرىپ-سوقتى دەيدى. وعان سومكەدەگى قارۋدى مەن ۇرلادىم دەپ ايتقىزعان”، – دەيدى يرينا.

اراشا سۇراعاندار اراسىندا جۇبايىم جازىقسىز دەگەن توعجان تىنىشتىقباي دا بار. كەلىنشەكتىڭ سوزىنشە، كۇيەۋى 5 قاڭتاردا پوليسيا دەپارتامەنتىنىڭ الدىنان قارۋ تاۋىپ الادى. ال ساقشىلار قارۋلاردى ءوز ەركىمەن وتكىزگەندەر قۋدالانبايدى دەگەنگە سەنىپ، اپارىپ بەرەدى. سول كەزدە ونى كۇدىكتى رەتىندە قاماپ قويعان.

“تىكەلەي اكىمگە اپارىپ بەرگەن. ارتىنان پوليسيا جىبەرگەن. ەشقانداي ول قارۋدان وق اتىلماعان. سول كەزدە ەشقانداي دا جازا قولدانىلمايدى، ءوزىم جاۋاپ بەرەمىن، ەشكىمنىڭ موينىنا ارتپايمىز دەپ ايتىپ جاتقان ادامدار قايدا؟”، – دەيدى توعجان.

وسىنداي داۋلى ىستەرگە قاتىستى ايماق ازاماتتارى شاعىمى بار انالار ءۇشىن قوعامدىق قابىلداۋلار وتكىزىپ، ءوزارا كوميسسيا قۇرعان.

“ازاپتاۋدى دوعارۋ كەرەك. جامبىل وبلىسىنىڭ پروكۋراتۋراسىنا ايتارىم بارلىق مالىمەتتەردى اشىق كورسەتۋى كەرەك. ءالى ەشقانداي مالىمەتتەردى كورسەتكەن جوق. ءبىز قانشا ادام ناقتى قازا بولعانىن، ناقتى قالامالعانداردىڭ سانىن بىلمەيمىز”، – دەيدى قوعام بەلسەندىسى نۇرلان قاناتوۆ.

ال جامبىل وبلىسى پوليسيا دەپارتامەنتى تەرگەۋ جۇمىستارى ازاپتاۋسىز، زاڭ اياسىندا ءجۇرىپ جاتىر دەپ جاۋاپ بەردى.

“بارلىق تەرگەۋ ارەكەتتەرى قورعاۋشىنىڭ قاتىسۋىمەن جۇرگىزىلىپ، بەينەجازبا جاسالۋدا. دالەلدەمەلەردى جيناۋ، قىلمىستىق پروسەستىك كودەكستىڭ نورمالارىنا سايكەس، قاتاڭ تۇردە جانە پروكۋروردىڭ قاداعالاۋىمەن جۇزەگە اسىرىلىپ جاتىر. جالپى العاندا 73 قىلمىستىق ءىس تىركەلدى”، – دەيدى جامبىل وبلىسى پد باستىعىنىڭ ورىنباسارى تەمىربەك ورازىمبەتوۆ.

بۇگىندە جامبىل وبلىسىندا جاپپاي تارتىپسىزدىككە قاتىسى بار دەگەن كۇدىكپەن 66 ادام قامالسا، ونىڭ 8ء-ى كامەلەتكە تولماعاندار. ءالى دە اقپاراتتىق اشىقتىق جوق دەگەن بەلسەندىلەر قاماۋعا وتىرعاندار سانى ەسەلەنۋى مۇمكىن دەگەندى ايتادى.
بۇل ماقالا تۋرالى نە ويلايسىز؟