ازاتتىققا وزبەكستاننىڭ قۇزىرلى ورگاندارىنان قىسىم كوردىك دەگەن ءۇش قاراقالپاق ازاماتى حابارلاسىپتى. ولار الەۋمەتتىك جەلىدە ساياسي نارازىلىق بىلدىرگەنى ءۇشىن قۋدالانعانىن ايتادى. قالالىق ميليسيا مەكەمەسىندە 5-8 ساعات ۇستاپ، قىسىم كورسەتتى دەيدى ولار.
بىرەۋىنىڭ سوزىنشە، ونى "تۇرمەگە قامالاسىڭ، تۋىستارىڭنىڭ ءومىرى قيىندايدى" دەپ قورقىتقان.
ميليسيا تەرگەۋى جانە قورقىتۋ
قاراقالپاق ازاماتىنىڭ ءبىرى داۋلەتمۇرات ءتاجىمۇراتوۆتىڭ سۋرەتىن Telegram-ارنادا ءبولىسىپ، ونى "باتىر" دەپ اتاعانى ءۇشىن ميليسيا باقىلاۋىنا تۇسكەنىن ايتادى. ول بىلتىر ماۋسىمدا وزبەكستاننىڭ جوعارعى سوتىندا ءتاجىمۇراتوۆتىڭ اپەللياسيالىق ارىزى قاناعاتتاندىرىلماعانىمەن كەلىسپەيتىنىن وسىلاي بىلدىرگىسى كەلگەن.
"تەرەزەسى جوق قاراڭعى بولمەگە الىپ كىرىپ، 4 ازامات قورقىتتى. ەكەۋى ميليسيا كيىمىندە بولدى. سەنى ءولتىرىپ تاستاساق، ەشكىم بىلمەي دە قالادى دەپ ايتتى" دەيدى ول.
قاراقالپاق ازاماتىنىڭ سوزىنشە، قۇزىرلى ورگان وكىلدەرى ونى الىپ بارعان جەر قالالىق ميليسيا مەكەمەسىنە ۇقسامايدى. ول ونى نوكىس قالاسىنىڭ شەتىندەگى "تەرەزەسى سىنىپ، قاڭىراپ بوس تۇرعان ەسكى عيمارات" دەپ سۋرەتتەيدى.
جەرگىلىكتى ميليسيا قاراقالپاق ازاماتىنا تۋىستارىنا حابار بەرۋگە، ادۆوكات جالداۋعا، ءتىپتى، ايىپتاۋلارعا قاتىستى قارسى سويلەۋگە تىيىم سالعان.
ازاتتىق بۇل بويىنشا وزبەكستان جوعارعى سوتىنا جانە ىشكى ىستەر مينيسترلىگىنە حات جولداپتى. ازىرگە جاۋاپ كەلمەگەن.
ورتالىق ازياداعى ادام قۇقىقتارى ماسەلەلەرىن زەرتتەيتىن حالىقارالىق Human Rights Watch ۇيىمىنىڭ تاشكەنتتەگى، الماتى مەن بىشكەكتەگى كەڭسەلەرىن باسقارعان ستيۆ سۆەردلوۆ مۇنىڭ ءبارى وزبەكستاننىڭ بۇرىنعى پرەزيدەنتى يسلام كاريموۆتەن قالعان "مۇرا" دەيدى.
"وزبەكستاندا 2016 جىلى بيلىك اۋىسقانىمەن ەلدەگى ادام قۇقىقتارىنىڭ ساقتالۋىنا قاتىستى رەفورما جۇرگىزىلمەدى. ميرزيايەۆ اكىمشىلىگى باسىندا سىندى اشىق قابىلدايمىز دەگەنىمەن، كەيىن جۋرناليستەر مەن بلوگەرلەرگە قىسىم كورسەتە باستادى" دەيدى ساراپشى.
