نزم باسقارما ءتوراعاسى ءانۋار جانعوزين نازاربايەۆ زياتكەرلىك مەكتەپتەرىنە مەملەكەت بيۋدجەتىنەن بولىنەتىن قاراجات تۋرالى ايتقان.
– بۇل باعىتتا اتا-انالاردى تىنىشتاندىرعىم كەلەدى. مەكتەپتەردىڭ كەلەشەگى جايلى بىزگە دە كوپ سۇراق قويىلادى. مەكتەپتەر تۇرعىسىنان ەشقانداي سۇراق جوق. گرانتتار شەڭبەرىندە ۇكىمەت ءبىزدى قورعاپ وتىر، – دەيدى ۇلىسمەدياعا بەرگەن سۇحباتىندا جانعوزين.
ونىڭ ايتۋىنشا، قارجىلاندىرۋدىڭ ەكىنشى كوزى – نىسانالى سالىم. ياعني جالپى ءبىلىم بەرەتىن قاراپايىم مەكتەپتەردە نازاربايەۆ زياتكەرلىك مەكتەپتەرىندەي ينفراقۇرىلىم جوق.
– زياتكەرلىك مەكتەپتەرىنىڭ ەڭ باستى ەرەكشەلىگى – كونتەنتىندە. وقۋ باعدارلاماسى، باعالاۋ جۇيەسى، مونيورينگ جۇيەسى، سىرتقى ەمتيحاندار، كادرلاردى دايارلاۋ جۇيەسى – ەلدە عانا ەمەس، بۇكىل الەمدەگى وقۋ وردالارىنان ءبىزدى ەرەكشەلەندىرىپ تۇرعان ارتىقشىلىقتار بارشىلىق. 15 جىل ىشىندە ءبىز ەل ىشىندە عانا ەمەس، الەمدە دە جەتەكشى مەكتەپتەردىڭ بىرىنە اينالدىق. سەبەبى ءقازىر ءبىزدىڭ تۇلەكتەرگە بەرىلەتىن سەرتيفيكاتتارىن الەمنىڭ 60 جوعارى وقۋ ورىنى مويىندايدى. بۇل نەنى بىلدىرەدى؟ كەمبريدج، مانچەستەر سياقتى، قىتايداعى ءبىرقاتار جوعارى وقۋ ورىندارى ءبىزدىڭ تۇلەكتەردىڭ سەرتيفيكاتىن كورىپ، وسىنداعى وقۋ تالاپتارى وزدەرىنىڭ تالاپتارىنا تولىعىمەن سايكەس كەلەتىنىن ايتتى. دەمەك، ول جوعارى وقۋ ورىندارى ءبىزدىڭ وقۋشىلاردى قوسىمشا ەمتيحانسىز وقۋعا قابىلدايدى، – دەيدى ول.
ءانۋار ءجانعوزيننىڭ سوزىنشە، ءدال وسى ادىستەمەلىك باعىتقا بولىنەتىن قاراجات ازايعان. 2022 جىلى بۇل باعىتتاعى قاراجات 4 ەسە ازايعان.
– ءبىز ءۇشىن بۇل ەداۋىر سىن-تەگەۋرىن. ءبىلىم ساپاسىن ارتتىرۋ ءۇشىن جۇمىستى قايتا فورماتتاۋ كەرەك. ارتىنشا، ساپالى كونتەنت پەن ساپالى وقۋ باعدارلاماسىن گەنەراسيالاپ، ىلگەرىلەتۋ مىندەتى تۇر. ەكىنشى جاعىنان، وسىنىڭ بارىنە ءبىز قازىرگى بيۋدجەتپەن جەتۋىمىز كەرەك. جالپى قارجىلاندىرۋدىڭ قىسقارۋى ءبىز ءۇشىن اسا ۇلكەن وزگەرىس دەپ تاعى ايتپاس ەدىم. قالاي بولعان جاعدايدا نزم قۇرىلعان كەزدە ەرتە مە، كەش پە، بيۋدجەت قارجىلاندىرۋى ازاياتىنى ايتىلعان. سول سەبەپتى مەكتەپتى ءوزىن-وزى اقتايتىن دارەجەگە جەتكىزۋ كەرەك. سول شارۋامەن اينالىسىپ جاتىرمىز. قازىرگى وتپەلى ءارى وزگەرىسكە تولى كەزەڭ قارقىندى دامۋدىڭ ساتىسى بولار دەگەن سەنىمدەمىن، – دەيدى جانعوزين.
