«Almaty» telearnasy jańa maýsymda ózindik ónim retinde 26 baǵdarlama usynbaq. Olardyń on biri – jańa joba. Kórermen suranysyn qanaǵattandyra almaǵan 13 baǵdarlama jabyldy. 4 telejobanyń formaty ózgertildi.
Telekanaldyń bas dırektory Tımýr Bazarbaevtyń aıtýynsha, brendtiń ózgerýi «Almaty TV» arnasynyń jańǵyrýyn jáne ónim sapasyn arttyrýǵa, dástúrli efır men sıfrlyq ınternet sınergıasyna bet alǵanyn kórsetedi. «Almaty» telekanaly eresekter aýdıtorıasyn da, áleýmettik jeliler men onlaın resýrstardy keńinen qoldanatyn jas kórermenderdi de qamtı alatyn «zamanaýı klasıkaǵa» barynsha kóńil bólmek.
«Habar taratýdyń jańǵyrǵan tujyrymdamasy jastardy kóbirek qamtýdy kózdeıdi. Sondyqtan bizdiń baǵdarlamalarymyzda otbasylyq qundylyqtardy nyǵaıtýǵa jáne otbasy músheleriniń yntymaǵyn arttyrýǵa basa kóńil bólinedi. Telekanal baǵdarlamalarynda Otanǵa degen mahabbat, jaqynǵa janashyrlyq, tarıhymyzǵa, mádenıet pen ónerimizge qurmetpen qaraý sıaqty sıaqty qasıetter dáriptelip otyrady. Óndiriletin baǵdarlamalar men telehıkaıalardyń 75 paıyzy qazaq tilinde bolady. Bizdiń basty muratymyz – kórermenderge der kezinde, ári shynaıy aqparat berý. Biz halyqty alańdatatyn ózekti máselelerdi kóterýmen qatar, kóptegen saýaldarǵa kórermendermen birge jaýap izdeımiz. Bizdiń basty mindetimiz - osy», - dep atap ótti Tımýr Bazarbaev.
Almaty TV jańa maýsymda usynyp otyrǵan jobalardyń ishinde Aınur İlıasova, İnjý Ánýarbek, Aıym Begmattyń áıel men bala densaýlyǵy týraly «Ana men bala» baǵdarlamasy, Serik Aqyshevtiń «IQ Almaty» atty mektep oqýshylaryna arnalǵan ıntellektýaldyq vıktorınasy, demalys kúngi tańǵy shoý «Sálem, Almaty!», «Juldyzdy taksı» atty mýzykalyq-ázil baǵdarlamasy, sondaı-aq, «Almatydaǵy áńgime», «Tańǵy stýdıo», «Almatınskıe ıstorıı», «Almaty so vkýsom», «Obo vsem bez kýpúr», «Sheshimi bar», «Temir tulpar» sıaqty jobalar bar. Jańa maýsymda aıtys janryna arnalǵan «Birjan – Sara izimen» atty erekshe formattaǵy baǵdarlamanyń tusaýy kesilmek.
Bıylǵy kúzde «Almaty» telekanaly ózindik ónim retinde birneshe telehıkaıa usynbaq. Olardyń ishinde Muhtar Áýezovtiń povesi jelisimen túsirilgen «Qıly zaman» telehıkaıasy, «Jazmysh» melodramalyq telehıkaıasy, «Aq pen qara», «Medeýdegi kezdesý», «Meniń bapkerim - 2» jáne «Taıtalas», «Meniń úıim" sıtkomy, sonymen qatar, Baıan Alagózova usynǵan «Tompı» komedıasy bar. Telekanal alǵash ret «co-production» prınsıpi boıynsha, «Salem Social» kompanıasymen birlesip, «Bıznes po-kyzdarskı» telehıkaıasyn usynady. Bul telehıkaıa avtorlary - YouTube jelisinde mıllıondaǵan kórermeni bar jas senarıster men rejıserlar.
Erteń, 9 qyrkúıekte, saǵat 20:00-de «Almaty TV» efırinen «Uly Seljúkter» telehıkaıasy kórermenge jol tartady. Túrik televıdenıesi shyǵarǵan bul eń iri, tarıhı telejobanyń bir ereksheligi, onda otandyq «HasSak» etnografıalyq ansambliniń oryndaýynda qazaqtyń 9 kúıi beriledi. Sonymen qatar, bul jobaǵa Jaıdarbek Kúnǵojınov jetekshilik etetin kásibı kaskaderlardan turatyn «Nomad Stans» toby qatysqan.
«Almaty» kanalyn damytý barysyndaǵy taǵy da bir negizgi baǵyt – dıdjıtal-ortada ózindik kontent qalyptastyrý. Mysaly, jaqyn arada áleýmettik jelilerge «Ia reporter», «Jelide», «SuperMen», «Kúnderek», «#REC» , t.b. ınteraktıvtik jobalar jol tartady .
21 shildede Almaty.tv saıty Aqparat jáne qoǵamdyq damý mınıstrliginiń aqparattyq agenttik jáne jelilik basylym retinde esepke alý týraly kýáligin aldy. 4 tamyzdan bastap «Almaty» telearnasy Qazaqstan Respýblıkasynyń barlyq aýmaǵynda mindetti túrde kórsetiletin kanaldar tizimine engizildi.
