Túrkistan oblysynyń polıseıleri adam óltirýge oqtalý qylmysyn ashty
Túrkistan oblysynda sheneýnik jýrnalısi óltirtý úshin 5 mln teńgege kıller jaldaǵany anyqtaldy, dep habarlaıdy Alash.press basylymy Azattyq Rýhy-na sileme jasap.
Osy jyldyń 3 qańtarynda áleýmettik jeliler men BAQ-ta Saryaǵash aýdanyndaǵy belgili jýrnalısiń úıine shabýyl jasalyp, onyń balasy jaraqat alǵany týraly aqparat taraǵan bolatyn.
«Sol kúni polısıa qyzmetkerleri bul jaıtty aýdandyq polısıa bóliminde tirkep, QR QK 24-99-baptary «adam óltirýge oqtalý» boıynsha sotqa deıingi tergeýdi bastady. Oblystyq polısıanyń úzdik jedel ýákilderi men tergeýshileri aýyr qylmysty ashýǵa baǵyttaldy», - delingen oblystyq PD habarlamasynda.
Jasalǵan qylmys týraly aqparatty alǵan soń, birden Saryaǵash aýdanyndaǵy qylmys ornyna meniń jedel qyzmet jónindegi orynbasarym Qurmanbek Sahov bastaǵan krımınaldyq polısıanyń kásibı qyzmetkerleri men tergeýshiler toby jiberildi.
«Olar kelgen boıda belgisiz bireýlerdiń jýrnalısiń úıine avtokólikpen baryp, terezeden oq atyp, qashyp ketkenderin anyqtady. Nátıjesinde úı ıesiniń uly jaraqat alǵan. Qylmysty ashýda biz birqatar nusqalardy negizge aldyq, onyń biri jýrnalısiń kásibı qyzmetine baılanysty osy qylmystyń jasalýy múmkin ekeni. Keıinnen dál osy nusqamyz rastaldy. Bul qylmysty izin sýytpaı ashýda oqıǵa oryn alǵan ýaqytta kýálerdiń bolmaýy da ózindik qıyndyq týǵyzdy.
Dese de jedel-izdestirý is-sharalaryn júrgizý barysynda osy oqıǵaǵa qatysy bar Shymkent qalasynyń eki jas turǵyny turǵylyqty jeri boıynsha ustaldy. Olar oq atyp, oqıǵa ornynan qashyp ketken. Sodan keıin polısıa qyzmetkerleri deldaldar men qylmysty tapsyrys berýshilerge shyqty. Búgingi tańda biz osy qylmysqa qatysy bar 5 kúdiktini ustadyq. Zattaı aıǵaq retinde olardan VAZ (2107/21110) markaly 2 avtokólik tárkilendi. Qylmysty oryndaýshylar bul avtokólikterdi qylmysty jasaǵandary úshin alǵan aqshaǵa satyp alǵan. Sondaı-aq olardan 16 kalıbrli patrondar alyndy», - dedi Túrkistan oblysy PD bastyǵy polısıa general-maıory Qaırat Dálbekov.
Qazirgi ýaqytta Saryaǵash aýdany turǵyndarynyń biri, ıaǵnı sheneýniktiń osy qylmysqa tapsyrys bergeni anyqtaldy. Ol jýrnalısiń ómirin 5 000 000 teńgege baǵalaǵan.
Óz kezeginde oryndaýshylar izderin jasyrý maqsatynda tapsyrysty oryndap, Saryaǵash aýdanynan Shardaraǵa, sodan soń Arys arqyly Shymkentke jetken.
«Qazir tergeý toby tıisti tergeý amaldaryn júrgizýde. Osy qylmystyq is aıasynda qajetti prosesýaldyq áreketter iske asyrylýda. Sotqa deıingi tergeý barysynda qylmystyń sebepteri men barlyq mán-jaılary anyqtalatyn bolady. Sot olardy qamaýǵa alýǵa sanksıa berip, kúdiktiler ýaqytsha ustaý ızolátoryna qamaldy», - dep qorytyndylady departament bastyǵy Q.Dálbekov.
