Tiri bolsam, qazaqqa qyzmet etpeı qoımaımyn!

Álıhan Bókeıhan

"Qazaqstanǵa úlken qaýip..."

19 qyrkúıek 2022 53
Belgili saıasatker Dos Kóshim Qyrǵyzstan men Tájikstan shekarasyndaǵy qaqtyǵysqa qatysty óz pikirin bildirdi. Onyń aıtýynsha, eki el arasyndaǵy teke-tireske Keńes úkimeti kezindegi shekarany belgileýde ketken qate sebep, dep habarlaıdy Alash.kz.


Qyrǵyz-Tájik shekarasyndaǵy atystan 59 adam qaza taýyp, 100-den astamy jaralandy. Qyrǵyzstan bıligi 140 myńǵa jýyq adamyn qaýipsiz jerge kóshirdi. Bul eki el arasynda bolyp jatqan alǵashqy qaqtyǵys emes.




2021 jyldyń kókteminde shekaradaǵy shıelinisten ondaǵan adam kóz jumǵan bolatyn. Saıasatker Dos Kóshim munyń sebebin Keńes úkimeti kezindegi ketken qatelerdiń saldarynan izdeıdi. Ol bul jaǵdaı Qazaqstanda da bolýy múmkin ekenin jasyrmaıdy.




"Keńes úkimeti kezinde respýblıkalar arasyndaǵy shekarany belgileýde kóp qate ketken. Árkim áli kúnge mynaý meniń jerim dep júr. Bul — birinshi másele. Al ekinshisi, meniń oıymsha, keleshekte Ortalyq Azıa, sonyń ishinde Qazaqstanǵa úlken qaýip bolatyn ol sý máselesi. Bizge de osy Qyrǵyz, Ózbekstan jaqtaǵy sý resýrstaryna qatysty úlken máseleler bar. Ony aıtyp ta, bilip te otyrmyz. Osy eki negizgi másele shekaradaǵy qaqtyǵysqa alyp kelip otyr", — dedi Dos Kóshim.




Aıta keteıik, eki eldiń basshylary qyrkúıektiń 16-da atysty toqtatý týraly kelisimge kelgen bolatyn. Biraq soǵan qaramastan shekaradaǵy jaǵdaı áli ýshyǵyp tur. Dýshanbe qaqtyǵysty Qyrǵyzstannyń shekara áskerleri týdyrdy dese, Bishkek Tájikstan arandatýshylyq jasady dep aıyptady. Saıasatker atysty toqtatýdyń birneshe joly bar deıdi.




"Eki eldiń basshylary ózara atysty toqtatýǵa keliskenmen, jergilikti halyqtyń ózara bir-birine degen óshpendiligi bar. Óıtkeni eki jaqtan kóp adam kóz jumdy, bul qandy kekke ulasyp ketýi múmkin. Bul teke-tires tek úshinshi memleket arlasqanda ǵana nemese Halyqaralyq uıymdar ortaǵa túskende ǵana sheshiledi. Qyrǵyzdyń sany az bolǵanymen, kúshi kóp. Umytpasam tájikter 9 mıllıonnyń ústinde, al qyrǵyzdar alty mıllıondaı ǵana. Al qarý-jaraǵyn salystyrsaq, qyrǵyzdar Tájikstanǵa qaraǵanda áskeri kóp. Sondyqtan ıt-jyǵys túsetin memleketter arasyndaǵy soǵys árdaıym uzaqqa sozylady", — dedi saıasatker.

Bul maqala týraly ne oılaısyz?