Sot Astana qalasynyń №2 Baıqońyr aýdandyq sotynda ótip jatyr. Tilshiler qaýymy Zoom júıesi arqyly qatysýda. Sot bastalar aldynda Qaırat Satybaldy týǵan inisi Ulttyq qaýipsizdik komıteti tóraǵasynyń burynǵy birinshi orynbasary Samat Ábishpen vıdeo arqyly sóılesti. Satybaldynyń birdeńe tapsyryp jatqany baıqaldy. Óz kezeginde Samat Ábish "jaqsy brat" dedi.
Sosyn Sánıa Toıken esimdi astanalyq tilshi Qaırat Satybaldydan "Siz memleketke keltirgen shyǵyndy qaıtardyńyz, endi nege otyrsyz?" degen suraq qoıǵan. Biraq Satybaldy sot kezinde jaýap bere almaıtynyn aıtty.
Sýdıa tilshilerge ashyq sot bolǵanymen, aýdıo-vıdeo túsirýge tyıym saldy.
Buǵan deıin tamyz aıynyń sońynda Antıkor Qaırat Satybaldyǵa qatysty sotqa deıingi tergeý aıaqtaǵanyn habarlaǵan.
Antıkor Satybaldyǵa qatysty "Qazaqtelekom" men "Kóliktik servıs ortalyǵynyń" qarajatyn asa iri kólemde urlaý deregin anyqtaǵanyn málim etken. Nátıjesinde zańsyz satyp alynǵan aktıvter men 240 mıllıard teńge memleketke qaıtaryldy. Oǵan qosa aıyptalýshylardyń el ishi men sheteldegi jyljymaıtyn múlik, avtomobılderi jáne 400 mıllıard teńge qarajaty anyqtaldy, olar jaqyn arada memleketke qaıtarylady.
