Vedomstvo ókilderiniń málimetinshe, jańa sý qoımalary 11 oblysta salynady.
Bes sý qoımasynyń qurylysyn bıyl bastaý josparlanyp otyr. Jańa sý qoımalary sýarmaly jerlerdiń aýdanyn 250 myń gektarǵa ulǵaıtýǵa jáne 137 myń turǵyny bar 70 eldi mekendi sý basý qaýpin azaıtýǵa septigin tıgizedi.
Sondaı-aq elimizdegi jumys istep turǵan 15 sý qoımasyna rekonstrýksıa jasalady. Bul 70 myń adam turatyn 64 eldi mekendi sý basý qaýpin azaıtýǵa, sondaı-aq 74 myń gektar sýarmaly jerge sý berýdi jaqsartýǵa múmkindik beredi.
Sý tasqyny kezeńiniń qorytyndysy boıynsha Sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyna ózgerister engiziledi. Memleket basshysynyń tapsyrmasyna sáıkes, tujyrymdamaǵa sý tasqynynyń aldyn alý jáne erigen qar sýyn jınap, ony odan ári aýyl sharýashylyǵynda jáne basqa da maqsattarǵa paıdalaný jóninde is-sharalar engiziledi.
Sý qoımalaryndaǵy qazirgi jaǵdaıǵa keletin bolsaq, dál osy saǵatta:
Qostanaı oblysynda sý tasqynynyń belsendi kezeńi ótip, óńirdegi eki iri sý qoımasy 92% sý jınady.
Soltústik Qazaqstan oblysynyń eki iri sý qoımasy 100% toldy. S tasqyny jalǵasyp jatyr.
Batys Qazaqstan oblysynda 4 iri sý qoımasy orta eseppen 70%-ǵa toldy. Irekli sý qoımasynan jiberilgen sý Qazaqstan shekarasyna ázirge jetken joq. Bul sý 15-20 sáýirde keledi dep kútilip otyr. Oblysta mınıstrliktiń jáne oblys ákimdiginiń mamandary birlesip sý ótkizýdi retteý boıynsha jumysty jalǵastyryp jatyr.
Shyǵys Qazaqstan oblysynda úsh iri sý qoımasynyń ortasha sý jınaý kólemi – 84,8%. Óńirde sý tasqyny bastaldy, sondyqtan Ertis sý qoımalary boıynsha sý jiberilip jatyr.
Aqmola oblysyndaǵy eki iri sý qoımasy 99% sý jınady. Óńirde sý tasqynynyń belsendi kezeńi ótti, biraq Jabaı ózeniniń rettelmeıtin aǵyny artyp keledi. Sondyqtan Aqmola oblysynyń Atbasar aýdanynda sý tasqyny qaýpi bar. Mınıstrlik, óńir ákimdigi jáne TJD qaýiptiń aldyn alý úshin belsendi jumys istep jatyr.
Aqtóbe oblysynda eki iri sý qoımasy 97%-ǵa toldy. Óńirdegi jaǵdaı turaqty.
Qaraǵandy oblysynyń 4 iri sý qoımasy 100% tolyp, oblysta sý tasqynynyń belsendi kezeńi aıaqtaldy. Jaǵdaı turaqty.
Qazaqstandaǵy barlyq nysandarda táýlik boıy kezekshilik jáne saǵat saıyn monıtorıń jalǵasyp jatyr.
