Tiri bolsam, qazaqqa qyzmet etpeı qoımaımyn!

Álıhan Bókeıhan

Qazaqstan úkimetine kúshtik qurylym ókili keldi - sarapshy

06 aqpan 2024 51
«Álternatıv» ózekti zertteýler ortalyǵynyń dırektory, saıasattanýshy Andreı Chebotarev Oljas Bektenovtiń Úkimet basshysy qyzmetine taǵaıyndalýyna qatysty pikir bildirdi, dep habarlaıdy alash.kz.

Onyń sózine qaraǵanda, Bektenov elimizde taǵaıyndalǵan eń jas premer-mınıstr bolýy múmkin. Al bul onyń Qazaqstandaǵy qazirgi jaǵdaıda kóp máseleniń sheshimin tabýǵa yqpal etetini sózsiz.
"Qazaqstan úkimetine alǵash ret kúshtik qurylym ókili basshylyqqa keldi. Iá, eks-premerler Ákejan Qajygeldın men Kárim Másimov bir kezderi arnaıy qyzmette istegenin bilemiz. Alaıda, olar burynyraqta – KSRO zamanynda bolǵan edi. Táýelsiz Qazaqstanda ekeýi de memlekettik qyzmetke bıznes salasynan keldi", - dedi sarapshy.

Ol Oljas Bektenovtiń jıyrma jyldan astam ýaqyttan beri úzdiksiz memlekettik qyzmette eńbek etip kele jatqanyn alǵa tartty.
"Onyń ústine, 10 jyldan asa ýaqyt sybaılas jemqorlyqqa qarsy kúresetin organda qyzmet etkenin bilemiz. Sybaılas jemqorlyqqa qarsy is-qımyl agenttiginiń tóraǵasyna deıin kóterilgen», – deıdi saıasattanýshy.

Andreı Chebotarevtyń sózine qaraǵanda, 2022 jyly aqpan aıynda Bektenovtiń Sybaılas jemqorlyqqa qarsy is-qımyl agenttiginiń tóraǵasy bolyp taǵaıyndalýy Memleket basshysy Qasym-Jomart Toqaevtyń oǵan qatty senetinin kórsetedi.
"Bektenov premer-mınıstr bolyp taǵaıyndalsa, ol uıymdastyrý-baqylaý máselelerine, memlekettik apparattaǵy jemqorlyqqa qarsy turýǵa, zańsyz jolmen tapqan aktıvterdi memleket baqylaýyna qaıtarýǵa jáne jańa «oıyn erejelerin» saqtaý boıynsha iri bıznes ókilderimen ózara is-áreket jasaýǵa basymdyq beredi. Osyǵan oraı, ekonomıkany jáne áleýmettik salany basqarý isi jetekshilik etýshi vıse-premerlerge júkteletin bolady. Demek, Úkimetke aıbar kórsetetin, iri isterdi atqaratyn ýaqyt keldi. Qazirgi ahýal sony talap etip tur. Tyń ózgerister jasaý úshin jastyq jiger qajet. Bul jiger Bektenovtiń boıynan tabylady degen oıdamyn. Óıtkeni, joǵaryda aıtqan derekterimdi negizge alyńyz», – dedi «Álternatıv» ózekti zertteýler ortalyǵynyń dırektory.

Ol, jalpy sózden iske kóshetin ýaqyttyń kelgenin atap ótti. Bul oraıda, jańa mınkabınet asa belsendilik tanytýy qajet.
Bul maqala týraly ne oılaısyz?