Quran kitabyn úsh jyl boıy qolmen jazyp shyqqan kallıgraf Sheıh Osman Toha (ulty qazaq) Shymkent qalasyna kelip, Seıitjan qarı Esjanuly rýhanı ortalyǵynyń resmı ashylý saltanatyna qatysty.
Seıitjan qarı Esjanuly atyndaǵy úlken meshit Shymkent qalasynyń jańa ákimshilik-iskerlik ortalyǵynda ornalasqan. Meshit ishinde bir mezette 12 myńǵa jýyq adam minájat ete alady. Al, meshittiń kireberis alańy 10 myńǵa jýyq adamǵa shaqtalǵan.
Qazaqstan – júreginde Quranǵa degen mahabbat bar halyq eken. Osyndaı halyqtyń ortasyna kelgenime qýanyshtymyn. Ekinshi qýanyshym – babamnyń kindik qany tamǵan jerine alǵash ret kelýim. Barshańyzǵa alǵysymdy aıtqym keledi, - dedi Sheıh Osman Toha.
Jasy 90-ǵa kelgen kallıgraf Saýd Arabıasynda turady, ulty – qazaq. Ol 1934 jyly dúnıege kelgen. Ákesi – sheıh Abdo ıbn Hýseın Toha meshit ımamy jáne ýaǵyzshy bolǵan. Kallıgrafıa erejesin sol ákesinen úırengen.
Sheıh Osman Toha Saýd Arabıasynda jyl saıyn mıllıondaǵan tırajben basylyp shyǵatyn Quran kitabyn jáne onyń birneshe tildegi aýdarmasyn óz qolymen jazyp shyqqan.
Esterińizde bolsa, meshittiń quryltaıshysy ataqty mıllıoner Serikjan Seıitjanov. Qaıbir jyly Seıitjanovtar Qaırat Satybaldynyń qyzyn kelin etip túsirip, Shymkentte astatók toı jasap, toıdy Tursynbek Qabatov basqaryp, birneshe tonna tort tartylǵan bolatyn qonaqtarǵa.
