Tiri bolsam, qazaqqa qyzmet etpeı qoımaımyn!

Álıhan Bókeıhan

"Bizdiń ishki isimizge aralaspańyz": Qyrǵyzstan prezıdenti qazaqstandyq bloger orys qyzyna jaýap berdi (VIDEO)

23 mamyr 2024 814

Qyrǵyzstan prezıdenti Sadyr Japarov qazaqstandyq bloger Anastasıa Ahmetovanyń Ystyqkól aımaǵyndaǵy ýrandy ıgerý týraly málimdemesine jaýap retinde vıdeo úndeý jarıalady, dep habarlaıdy Alash.kz.

Kaktus.media saıtynyń habarlaýynsha, buǵan deıin bloger óziniń TikTok vıdeosynda saıasattanýshy, Eýrazıalyq analıtıkalyq klýbtyń jetekshisi Nıkıta Mendkovıchtiń «ınsaıderlik aqparatyna» silteme jasap, ol «Rotshıldterdiń fransýzdyq bólimshesi ýran óndirý quqyǵyn alýǵa yntaly» dep málimdegen.

Bloger bul kelissózderdiń artynda Qyrǵyzstan mınıstrler kabınetiniń basshysy Aqylbek Japarov, al mınıstrler kabıneti tóraǵasynyń orynbasary Edil Baısalov osy shemanyń negizgi lobbısi bolyp tabylady dep málimdegen bolatyn.

Buǵan jaýap retinde Sadyr Japarov bes mınýttyq vıdeo úndeý túsirip, Ahmetovanyń sózderiniń jalǵan ekenin aıtty. Prezıdenttiń aıtýynsha, «eldi turaqsyzdandyrýdy qalaıtyn syrtqy kúshter kóp».

Qyrǵyzstan prezıdentiniń aıtýynsha, «elde ekonomıkamyzǵa paıda ákeletin jobalar bastala salysymen, syrtqy kúshter kútpegen jerden paıda bolady».

Ol 2019 jyly At-Bashyda bolǵan oqıǵany mysalǵa keltirdi: Japarovtyń aıtýynsha, sol kezde keıbir ınvestorlar logıstıkalyq ortalyq salǵysy kelip, 280 mıllıon dollar quımaq bolǵan, biraq Anastasıa Ahmetova sekildi adamdar jergilikti turǵyndardy aldap, qarsylyq kórsetýlerin suraǵan. Japarov «keıin jergilikti turǵyndar ortalyqtyń salynbaǵanyna ókingenin» aıtady.

"Qazir de solaı bolyp jatyr. Osyǵan baılanysty, qurmetti jerlester, aq pen qarany, dos pen jaýdan aıyrýlaryńyzdy suraımyn. Qazir ınternettegi árbir aqparatty tekserý kerek. Senýdiń qajeti joq. Bizdiń isimizge eshkim aralaspaýyn qadaǵalaý kerek», - dedi Japarov.

Bul maqala týraly ne oılaısyz?