Tiri bolsam, qazaqqa qyzmet etpeı qoımaımyn!

Álıhan Bókeıhan

Gazeta betin shubarlaǵan qur qaǵaz emes, jurtyna qyzmet etýshi ultynyń uly ekendigin sańylaýsyzdar bolmasa, sanaly qazaq tanydy

22 mamyr 2024 265

2 fevralda "Qazaq" ekiden úshke shyqty. Jańa gazeta jas bala sıaqty. Bala bastapqy kezinde anaý-mynaýdy elegish keledi. Bir-eki jyldy artqa salyp alǵan soń, býyny bekip, buǵanasy qata bastaıdy. Ata-anasy minezin bilip, synyn tanyp, syryn túıe bastaıdy. Gazeta týraly da naq solaı.

Anaý-mynaýdy elegish názik kúıin ótkizip, gazetimiz úshke qarady. Aıyryqsha bir apatqa ushyramasa, az-máz nárseni elemeı óter degen úmit zor.

Gazeta betin shubarlaǵan qur qaǵaz emes, jurtyna qyzmet etýshi ultynyń uly ekendigin sańylaýsyzdar bolmasa, sanaly qazaq tanydy. Ol tanyǵandyǵyn osy ótken jyl kórsetti. "Táńiri asyraǵan toqtyny bóri jemes" degen. Táńirden sońǵy kúshti halyq qoı. Halyq qolyndaǵy is anaý-mynaýdyń qastyǵymen óshpeıtinin kózben kórip, qolmen ustaǵandaı boldyq. Jurt jumysynyń tegermeshi ilgeri aınalsa, ony shybyq salyp toqtatamyn degender qur aram ter bolýy qashannan-aq bar nárse.

Aram ter bolǵandar bola bersin. Ahmet bolmasa, Mirjaqyp shyǵarar. Ol bolmasa, onan basqa shyǵarar. Biraq qazaq gazetasyz turǵysy kelmeıtinin bildik. Soǵan kózi jetip, "kúshtige syıynsań Qudaıǵa syıyn" degen áýeli Qudaıǵa senip, ekinshi, Qudaıdan sońǵy kúshti halyqqa súıenip, "Qazaq" aldaǵy jasyna aıaq basty. Qaıyrly bolsyn!

Qyr balasy.

"Qazaq" gazeti, №93, 1915 jyl.

Orynbor qalasy

Derekkóz: Bókeıhan Á. Shyǵarmalary. IX tom.- Astana, 2018

Alash.kz ulttyq portaly

Bul maqala týraly ne oılaısyz?