Tiri bolsam, qazaqqa qyzmet etpeı qoımaımyn!

Álıhan Bókeıhan

Qytaıdaǵy Qara Ertiske salynǵan sý qoıma jaryldy. SHQO-ǵa qaýip bar ma?

24 mamyr 2024 367

SHQO-da sý tasqynyna qarsy is-sharalar júrgizilede, dep habarlaıdy Alash.kz  TJM-ge silteme jasap.

Mınıstrlik ne deıdi

Qazirgi ýaqytta Tótenshe jaǵdaılar mınıstrligi qutqarýshylarynyń kúshimen jáne jergilikti atqarý organdarmen Marqakól aýdany Boran aýylynda qapshyqtardy tóseý jáne bógetterdi bıiktetý boıynsha jumystar uıymdastyrylǵan.

Táýlik ishinde 470 qap tóselip, uzyndyǵy 250 m úıindi bekitilgen.

– Qara Ertis ózeniniń deńgeıine táýlik boıy monıtorıń júrgizilýde, – delingen mınıstrliktiń habarlamasynda.

Qytaıdaǵy bógettiń jarylýy

Qytaıda keshe bógettiń buzylǵany belgili boldy.

Bul jaǵdaıǵa Sý jáne sýarý mınıstrligi túsinikteme berdi. Olar Qytaıdan kelgen áriptesterimen únemi baılanysta ekenin habarlady. Qytaı tarapy transshekaralyq ózender arqyly 1400 m3/s sý aǵyzatynyn habarlaǵan.

Eldi mekenderdi sý basý qaýpi joq, dep naqtylady mınıstrlik.

– Boran gıdroposty aýdanyndaǵy Qara Ertis ózenindegi sý shyǵyny búginde 1700 m3/s, sý deńgeıi 543 sm qurady. Aǵynnyń qashan jetetinin eskere otyryp, Qara Ertis ózeniniń – Boran aýylynyń gıdrologıalyq beketinde sý deńgeıiniń kóterilýi kútilýde.

Osyǵan baılanysty, SHQO Qazsýshar fılıaly mamandarynyń jumysy kúsheıtilgen rejımge aýystyryldy. Óskemen sý qoımasynan (Buqtyrma sý qoımasynyń kontrregýlátory) aǵyzý 500 m3/s-tan 800 m3/s - qa deıin ulǵaıtyldy, jaǵdaı mınıstrdiń erekshe baqylaýynda", - dep habarlady mınıstrliktegiler.

Mınıstr Nurjan Nurjigitov erteń Shyǵys Qazaqstan oblysyna barady.

Aýdandarǵa taraǵan habar

Qara Ertis ózeniniń mańaıyndaǵy aýdandarǵa mynadaı habarlama taraǵan. 

– Qytaı Halyq Respýblıkasy, Býrshyn aýdanynda sý qoımasy jaryldy. Osy sý qoımasyndaǵy jınalǵan sý Qara ertiske quıady, ózen deńgeıiniń mólsherden tys kóterilýine baılanysty Qara Ertis ózeniniń jaǵalaýyna barmaýlaryńyz suralady, – delingen aqparatta.

Bul maqala týraly ne oılaısyz?