Sarqyt Salqanov esimdi azamat bıylǵy qańtarda Taldyqorǵanda bolǵan sherýde kópshilik aldynda sóz sóılegen. KTK telearnasynyń málimetine sáıkes, 32 jastaǵy azamattyń týysqandary onyń mıtıńide basbuzarlyqqa barmaǵanyn aıtqan.
– Salqanov Sarqytty 12 qańtarda alyp ketip, SIZO-aǵa alyp baryp soqqan. Barlyq anyqtamalary bar. Qatty zaqym alǵan. Qabyrǵalary synǵan. Sodan keıin ony bosatyp, qaıtadan qańtarda alyp ketti. Mine, 40 kúndeı boldy, áli qamaýda, – dedi Sarqyt Salqanovtyń qaryndasy Qalamqas Bısembaeva.
Sarqyt Salqanovtyń advokaty onyń ońbaı taıaq jegenin aıtyp, tipti Sarqytty útikpen kúıdirmek bolǵanyn aıtty.
– Sóziniń aıaǵynda «júrińder ákimdikke» degen ǵoı. Sosyn eń sońynda «esh nárse búldirmeńder, qıratpańdar» degen. Tergeý saraptama taǵaıyndap jatyr. Aıqaılaǵan daýys sonyki me, bul jerde buzaqylyqqa shaqyrý bar ma degendeı, fılologıalyq saraptama júrgizip jatyr. Sony kútip otyrmyz, – dedi advokat Tólegen Berdiqoja.
«Aqıqat» qoǵamdyq komısıasynyń jetekshisi Aıman Omarova túrmedegi azaptaýǵa qatysty birde-bir istiń áli sotqa jetpegenin aıtty.
– Komısıanyń aralasýymen 60-tan astam adam bosatyldy. Al senbi kúni 20 adam abaqtydan shyqty. 10 adam Almaty qalasynan, 10 adam Almaty oblysynan bosatyldy. Atyraýdan qansha adam shyǵatynyn bilmeımiz, Qyzylordadan «9 adam shyǵarylyp jatyr» degen hat aldyq, – dedi Omarova.
