24 aqpanǵa qaraǵan túni Reseı prezıdenti Vladımır Pýtın memlekettik telearnalardan málimdeme jasap, Reseı armıasynyń Ýkraına áskerimen soǵysatynyn habarlady.
"Men arnaıy áskerı operasıa bastaý týraly sheshim qabyldadym. Onyń maqsaty – segiz jyl boıy Kıev qorlyq kórsetip, genosıd jasap kelgen adamdardy qorǵaý. Bul úshin biz Ýkraınany demılıtarızasıa men denasıfıkasıa jasaýǵa, oǵan qosa beıbit turǵyndarǵa, sonyń ishinde Reseı federasıasy azamattaryna da qarsy kóptegen qandy qylmys jasaǵandardy sotqa tartýǵa tyrysamyz" dedi Pýtın.
Aqparat quraldary Ýkraınanyń keıbir qalalarynda jarylys bolǵanyn habarlap jatyr.
Qazaqstannyń Kıevtegi elshiliginiń kezekshisi Kıev ýaqytymen tańerteńgi saǵat beste Azattyq tilshisi qalada jaǵdaı tynysh ekenin habarlady.
"Elshilik qyzmetkerleri evakýasıalanǵan joq. Ortalyqtan (Nur-Sultan) habar kútip otyrmyz" dedi ol.
Qazaqstan syrtqy ister mınıstrliginiń resmı ókili Aıbek Smadıarov 24 aqpanda tańerteń elshilik qyzmetkerlerin evakýsıalaý máselesin qarastyryp jatqanyn aıty.
– Qazir oılastyryp jatyrmyz. Ol úshin ushaq daıyndaý kerek. Qazir ushaqtar ushyp jatqan joq. Qazir júgirip júrmiz, – dedi ol Azattyq tilshisine.
Resmı málimet boıynsha, Qazaqstannyń konsýldyǵynda ýaqytsha tirkeýde 517 adam, turaqty tirkeýde 1113 adam tur. Olar negizinen Kıev qalasy, Kıev, Odessa, Harkov, Lvov oblystarynda turady.
