Reseı kórshi elge áskerı operasıa bastaǵannan keıin BUU bas hatshysy Antonıý Gýterrısh Máskeýdi Ýkraınaǵa agresıa jasaýyn doǵarýǵa shaqyrdy.
"Prezıdent Pýtın, adamzat úshin áskerińdi alyp ket" dedi bas hatshy BUU Qaýipsizdik keńesiniń tótenshe kezdesýinen keıin.
"Adamzat úshin Eýropada soǵystyń bastalýyna jol berme, ǵasyr bastalǵaly bergi eń aýyr soǵys bolaıyn dep tur" dedi Gýterrısh. Qaqtyǵys "toqtaýy tıis" dedi ol.
Birneshe saǵat buryn Reseı basshysy Vladımır Pýtın reseılik memlekettik telearnalardan málimdeme jasap, Donbasta "arnaıy operasıa" bastaıtynyn habarlaǵan. Budan soń Ýkraınanyń birqatar qalalary men oblystarynda jarylys bolǵany, oq atylǵany jaıly aqparat údegen. Kýágerlerdiń aıtýynsha, Donbastyń ózinde reseıshil separatıster tarabynan atqylaý kúsheıgen, Ýkraınanyń barlyq-derlik aýmaǵynda áskerı nysandar shabýylǵa ushyraǵan.
NATO bas hatshysy Iens Stoltenberg Reseıdiń Ýkraınaǵa qatysty áreketin aıyptady.
"Bul halyqaralyq quqyqty óreskel buzý, Eýroatlantıkalyq qaýipsizdikke tóngen qater. Reseıdi tez arada áskerı qımylyn doǵaryp, Ýkraınanyń egemendigi men terıtorıalyq tutastyǵyn saqtaýǵa shaqyramyn" dedi Stoltenberg.
Ýkraına basshysy Vladımır Zelenskıı halyqqa úndeý jasap, úreılenbeýge shaqyrdy. Elde áskerı jaǵdaı jarıalandy.