24 aqpanda túste Oyan, Qazaqstan qozǵalysy ókilderi Reseıdiń Almatydaǵy konsýldyǵy aldynda narazylyq ótkizip, Reseıdiń Ýkraınaǵa qatysty áreketin aıyptady.
– Biz túbegeıli túrde soǵysqa qarsymyz. Reseı Ýkraınaǵa soǵys ashty, sýverendi memleketke shabýyl jasady. Biz mundaı áreketti qoldamaımyz. Ýkraınamen birge ekenimizdi bildirgimiz keledi. Qazaqstanda olardy túsinetin, qoldaıtyn adamdar bar ekenin, jalǵyz emes ekenin jetkizgimiz keledi. Sol sebepti narazylyq bildirý úshin Reseı konsýldyǵyna keldik, – dedi belsendi Darhan Sháripov.
Azattyq oqıǵa ornynan tikeleı efırde habar taratty:
Jınalǵandar "Slava Ýkraıne!" (Ýkraına jasasyn!) dep aıqaılady. Olardyń qolynda Ýkraına týy men "Ýkraınadan qolyńdy tart! Soǵys bolmasyn!" degen aǵylshynsha jáne ýkraın tilinde jazylǵan plakattar boldy.
– Ýkraınany qoldaý úshin osy jerge keldim. Tańerteńgi aqparattardyń barlyǵy meni de ashýlandyrdy. Sebebi barlyǵymyz Úshinshi dúnıejúzilik soǵysqa kýá bolyp otyrmyz. Buǵan qosa, bul jaǵdaı bizdegi Qańtar oqıǵasyna da uqsas, – dedi Ámına esimdi belsendi.
Oqıǵany polısıa syrttaı baqylap turdy.
- 24 aqpanda Reseı basshysy Vladımır Pýtın reseılik memlekettik telearnalardan málimdeme jasap, Donbasta "arnaıy operasıa" bastaıtynyn habarlaǵan. Budan soń Ýkraınanyń birqatar qalalary men oblystarynda jarylys bolǵany, oq atylǵany jaıly aqparat údegen. Kýágerlerdiń aıtýynsha, Donbastyń ózinde reseıshil separatıster tarabynan atqylaý kúsheıgen, Ýkraınanyń barlyq-derlik aýmaǵynda áskerı nysandar shabýylǵa ushyraǵan.
- NATO bas hatshysy Iens Stoltenberg Reseıdiń Ýkraınaǵa qatysty áreketin aıyptady. Ýkraına basshysy Vladımır Zelenskıı halyqqa úndeý jasap, úreılenbeýge shaqyrdy. Elde áskerı jaǵdaı jarıalandy. BUU bas hatshysy Antonıý Gýterrısh Máskeýdi "adamzat úshin áskerin Ýkraınadan áketýge" úndedi.
