Tiri bolsam, qazaqqa qyzmet etpeı qoımaımyn!

Álıhan Bókeıhan

Qańtar oqıǵasy: Azaptaý boıynsha 170 qylmystyq is qozǵalǵan

13 aqpan 2022 87
Qańtar oqıǵasyna baılanysty ustalǵandardan 305 shaǵym tústi. Senbi kúni Qaýipsizdik keńesiniń otyrysynda bas prokýror Ǵızat Nurdáýletov osylaı dep málimdedi. Quqyq qorǵaýshylar men advokattar, ustalǵandardyń týystary tarabynan qamaýdaǵy azaptaýlarǵa qatysty shaǵym kóbeıgen tusta osyndaı málimet aıtyldy. Bul týraly Azattyq jazdy.

Nurdáýletovtiń aıtýynsha, "zańsyz tergeý ádisteri" boıynsha túsken 62 shaǵym rastalmaǵan. Azaptaý jáne bılik ókiletin asyra paıdalaný faktileri boıynsha 170 qylmystyq is qozǵalǵan. Qalǵan 73 shaǵymǵa qatysty Aqorda habarlamasynda eshteńe aıtylmaǵan.

"Árbir jaǵdaıdy muqıat qaraımyz, bultartpas dálel bar bolǵan jaǵdaıda ǵana jaýapqa tartamyz" dep Aqorda saıty bas prokýrordyń sózinen úzindi keltiredi.

Qazaqstana qańtar oqıǵasy kezinde jáne odan keıin myńdaǵan adam ustalyp, júzdegen adam "terorızm", "jappaı tártipsizdik", "qarý-jaraqty urlaý" jáne ózge qylmys jasady degen kúdikpen qamaýǵa alynǵan. Ustalǵandardyń kóbiniń týystary qamaý kezindegi azaptaýlarǵa shaǵymdandy: olardyń sózine qaraǵanda, polısıa bólimshelerinde jaqyndarynyń ústinen ystyq sý quıyp, útikpen jáne elektroshokermen kúıdirgen, qatty uryp-soqqan.

Qazaqstanda azaptaýlar týraly ister sotqa sırek jetedi jáne kóp jaǵdaıda aıyptaý úkimi shyǵa bermeıdi. Mundaı ister ádette "qylmys quramy joq bolǵandyqtan" jabylady.

Nurdáýletovtiń aıtýynsha, arnaıy prokýrorlar jetekshiligimen vedomstvoaralyq tergeý tobynda "jappaı tártipsizdik jáne terorızm aktisi" boıynsha 177 is bar. 779 adam qamaýda otyr.

"Azamattardyń jeke bas málimetteri, densaýlyǵy men ózge de materıaldar anyqtalǵannan keıin 109 adamnyń qamaý sharasy eshqaıda ketpeý jáne jeke kepildik berý týraly qolhattarmen almastyryldy. Prokýrorlar tártipsizdikke qatysy bary dáleldenbegen 103 adamdy bosatty" dedi Nurdáýletov.

  • Qańtar aıynyń basynda Mańǵystaý oblysynda bastalǵan narazylyq eldiń ózge óńirlerine jyldam jaıyldy. Keıbir óńirde tártipsizdikter boldy. Resmı málimet boıynsha, qańtar oqıǵasy kezinde keminde 227 adam qaza boldy. Bılik qaza bolǵandardyń tizimin jarıalamady.

  • Azamattyq belsendilerdiń aıtýynsha, qaza bolǵandar arasynda beıbit azamattar kóp.

  • 6 qańtarǵa qaraǵan túni Qaýipsizdik keńesiniń shuǵyl otyrysynda prezıdent Qasym-Jomart Toqaev alǵash ret "terrorıst" sózin qoldandy. Ol Qazaqstanǵa "is júzinde halyqaralyq terorıstik top" shabýyl jasady dep málimdedi. Ol bul tirkesti UQSHU-dan "áskerı kómek" suraý úshin jáne kúshtik qurylymdarǵa "arnaıy operasıa" kezinde "eskertýsiz oq atýǵa" buıryq berý úshin paıdalandy. Bılik "syrttan agresıa bolǵany" týraly tujyrymyna áli kúnge deıin dálel keltirmedi.

  • Jergilikti jáne halyqaralyq quqyq qorǵaýshylar Qazaqstan bıligin azaptaýdy doǵarýǵa, oǵan kinálilerdi jaýapqa tartýǵa shaqyrǵan.

  • Bas prokýratýra azaptaý boıynsha qylmystyq ister qozǵalǵanyn aıtqanmen qansha polıseıdiń ustalǵany týraly aqparat bermedi.

Bul maqala týraly ne oılaısyz?