Qytaı isi boıynsha Kongres-atqarý komısıasynyń (CECC) eki birdeı tóraǵysy AQSH Memlekettik departamentine hat joldap, Qazaqstan, Saýd Arabıasy jáne Marokko elderinen pana izdegen uıǵyrlar men qazaqtardyń isine dıplomatıalyq jolmen yqpal etýdi surady. Bul týraly komısıanyń resmı saıty málimdedi.
Memleket hatshy Antonı Blınkenniń (Anthony Blinken) atyna hat jazyp júrgen atalmysh komısıanyń Jeff Merklı jáne Jeıms P. MakGovern atty demokrat tórǵalary. Olar hatynda bul pana izdeýshilerdi Qytaıǵa qaıtarý halyqaralyq quqyqty buzatynyn, oǵan qosa qaıtarylǵan jaǵdaıda olardyń negizsiz qamalý, azaptalý qaýpiniń bar ekenin aıtqan. Sondaı-aq, pana izdeýshilerdi Qytaıǵa qaıtarý múmkindigi bar elder qatarynda Saýd Arabıasy, Marokko elderimen qatar Qazaqstandy da ataǵan.
Komısıa tóraǵalary hatynda Memlekettik departament basshysynan qazaqstandyq sheneýnikterden "osy alańdatarlyq máseleni rastaıtyn qosymsha málimetter suraýdy, ári "Shyńjańdaǵy genosıd pen adamzatqa qarsy qylmystardy eskere otyryp" atalǵan elderdegi pana izdeýshilerdiń Qytaıǵa qaıtarylmaýyna dıplomatıalyq jolmen áser etýge shaqyrady.
