Tiri bolsam, qazaqqa qyzmet etpeı qoımaımyn!

Álıhan Bókeıhan

Almatyda alańda qalǵandarǵa prokýratýra men ákimdik ókilderi keldi. Polısıa birneshe adamdy ustap, bosatty

14 aqpan 2022 74
13 aqpanda kúndiz Almatynyń Respýblıka alańynda qalǵan ondaǵan adamǵa jergilikti prokýratýra jáne ákimdik ókilderi kelip, sharanyń "zańsyz" ekenin eskertip, taraýdy surady. Jeksenbi kúni birneshe saǵatqa sozylǵan Qańtar qyrǵyny qurbandaryn eske alý sharasynan keıin jınalǵandardyń bir bóligi tarap, bir bóligi qalǵan edi.



Polısıa demonstranttarǵa dúkennen tamaq ákelýge ketken úsh áıeldi ustaǵan. Olar Bostandyq aýdandyq polısıa basqarmasyna jetkizilgen. Alańdaǵy narazylar olardy bosatýdy jáne alańǵa ákelýdi talap etti. Al prokýratýra ókilderi narazylar mıtıńini toqtatsa, demonstranttardyń talabyn oryndaıtynyn jetkizgen.

Kúndizgi 4 jarym shamasynda ustalǵan úsh adamnyń bosatylǵany habarlandy. Prokýratýra ókilderi jınalǵandarǵa ózderimen birge prokýratýraǵa baryp, talaptary jazylǵan ótinishterin tapsyrýdy usynǵan. Jınalǵandar kelisken. Alańda qalǵandardyń basym bóligi – "Demokratıalyq partıa" qurǵysy keletin bastama top ókilderi. Artynsha on adam mıkroavtobýspen prokýratýraǵa qaraı ketti.

Keshki saǵat 5 jarym shamasynda alańda eshkim qalmady.

Jeksenbi túste Respýblıka alańynda júzdegen adam qatysqan Qańtar qurbandaryn eske alý sharasy ótti. Oǵan eldegi túrli saıası kúshter, belsendiler, qala turǵyndary qatysty. Jınalǵandar Qańtar oqıǵasyn táýelsiz zertteýdi, ustalǵandardy azaptaýdy toqtatýdy talap etti. Keıbir prezıdent Qasym-Jomart Toqaevqa ımpıchment jarıalaý týraly da usynys aıtqan. Birneshe saǵatqa sozylǵan sharadan keıin narazylardyń bir bóligi tarap ketken. Al alańda qalǵan ondaǵan adam palatka quryp, narazylyqty jalǵastyrýǵa oqtalǵan edi. Olar qala ákimi Erbolat Dosaevtyń alańǵa kelýin talap etken. Kóp uzamaı olarǵa quqyq qorǵaý organ ókilder keldi. Aýmaqta polısıa kóbeıip, avtozaktar baıqalǵan.

  • Bıyl qańtarda Jańaózen men Aqtaý qalalarynda suıytylǵan gaz baǵasynyń qymbattaýyna baılanysty jappaı narazylyq bastalyp, onyń sońy el aýmaǵynda tártipsizdik pen zorlyq-zombylyqqa ulasqan. Basqa aımaqtarda bolǵan qaqtyǵys, atys kesirinen keminde 227 adam qaza boldy.

  • Quqyq qorǵaýshylardyń aıtýynsha, olardyń basym bóligi beıbit azamattar. Qoǵam talabyna qaramastan bılik olardyń aty-jónin jarıalamaı keledi.

  • Buǵan deıin quqyq qorǵaýshylar men belsendiler qaza bolǵandardyń aty-jónin óz betinshe anyqtap, jarıalaǵan. Azattyq ta olardyń tizimin qurastyrǵan. 11 aqpanda keshke oqıǵa qurbandarynyń tizimi jarıalanǵan Azattyq paraqshasy kenet ashylmaı qaldy. Eldegi eń iri provaıder "Qazaqtelekom" kompanıasy túsinikteme bermedi.

  • Qazaqstanda qańtar oqıǵasy kezinde jáne odan keıin myńdaǵan adam ustalyp, júzdegen adam "terorızm", "jappaı tártipsizdik", "qarý-jaraqty urlaý" jáne ózge qylmys jasady degen kúdikpen qamaýǵa alyndy. Ustalǵandardyń kóbiniń týystary qamaý kezindegi azaptaýlarǵa shaǵymdandy: olardyń sózine qaraǵanda, polısıa bólimshelerinde jaqyndarynyń ústinen ystyq sý quıyp, útikpen jáne elektroshokermen kúıdirgen, qatty uryp-soqqan. Qylmysty moıyndatýǵa tyrysqan. Buǵan deıin Bas prokýratýra ustalǵandardan azaptaý jáne zańsyz tergeý ádisin qoldaný boıynsha 300-den astam shaǵym túskenin, 170-i boıynsha qylmystyq is qozǵalǵanyn habarlaǵan. Degenmen vedomstvo áli kúnge deıin qansha polıseıdiń ustalǵanyn aıtpaı otyr.

  • Halyqaralyq jáne jergilikti quqyq qorǵaýshylar men uıymdar Qazaqstan bıliginen oqıǵany jan-jaqty táýelsiz ashyq zertteýge shaqyrǵan. Osy aptada Human Rights Watch uıymy Nur-Sultandy zertteý tobyna tájirıbeli halyqaralyq sarapshylardy da qosýǵa úndegen.




[ad_2]

Derekkóz
Bul maqala týraly ne oılaısyz?