Tiri bolsam, qazaqqa qyzmet etpeı qoımaımyn!

Álıhan Bókeıhan

"Otbasy bank" nesıeniń barlyq somasyna paıyzdyq mólsherleme ala ma? Bektenov jaýap berdi

29 naýryz 2024 185

Depýtattar «Otbasy bankinen» ıpoteka alǵan azamattar depozıtke somanyń jartysyn jınaıtynyn aıtty. Keıinirek bank qaryz alýshyǵa múlikti satyp alý úshin jetpeı turǵan bóligin beredi. Bul rette bank turǵyn úıdiń búkil qunyna syıaqy mólsherlemesin belgileıdi. Bul – adamnyń óz qarajaty jáne bank bergen soma.

Oljas Bektenov áýeli bankke salymshy qarjyny qalaı jınaıtynyna toqtaldy. «Otbasy bank» AQ turǵyn úı qurylysy jınaqtary sharty boıynsha, qaryz salymshyǵa keminde 3 jyl shotta qajet somanyń 50%-yn mindetti jınaǵan kezde beriledi. Bul rette qaryz alýshy banktiń syıaqysyn jınaǵan qarajatty esepke almaı, qaryz somasyna ǵana tóleıdi.

Salymshynyń qarajat jınaýǵa múmkindigi bolmasa, biraq qajet somanyń 50%-y bar bolsa, ol aralyq dep atalatyn qaryzdy merziminen buryn ala alady. Bul jaǵdaıda somanyń 50%-y salynǵan qarajat aralyq qaryzdy paıdalaný kezeńine (3 jyl) kepil retinde áreket etedi.

«Bul tásilde ıpotekalyq qaryz klıentke qajet somanyń 100% mólsherinde beriledi. Oǵan qosa banktiń syıaqysy berilgen barlyq somaǵa esepteledi. Depozıt merzimi keminde úsh jyl bolǵannan keıin qaryz alýshynyń bankte saqtalǵan somasynyń 50%-y mólsherindegi qarajaty aralyq qaryzdy óteý esebine ótedi. Alqaryz alýshy mólsherlemesi jyldyq 3,5-5%-ǵa deıin tómendetiletin turǵyn úı qaryzyna aýysady», – dep jaýap berdi Premer-mınıstr.

«Otbasy bank» pen komersıalyq bankti salystyrý

Oljas Bektenov «Otbasy bankten» ıpoteka alý men jeke komersıalyq bankten ıpoteka alýdy salystyrdy.

«Salystyryp qarasaq, turǵyn úı quny 30 mln teńge, jyldyq mólsherleme 18% jáne bastapqy jarna 20% bolǵan kezde ekinshi deńgeıdegi komersıalyq banktiń qaryz alýshysy 10 jyl ishinde aı saıyn shamamen 430 myń teńge tóleıdi. Nátıjesinde artyq tólem eki esege jýyq bolady», – delingen jaýapta.

«Otbasy bankiniń» aralyq qaryz júıesi boıynsha jyldyq syıaqy mólsherlemesi 7%, qaryz somasy 30 mln teńge jáne bastapqy jarna 50% boldy deıik. Osyndaı merzim ishinde qaryz alýshy alǵashqy 3 jylda aı saıyn 200 myń teńgeden astam aqsha tóleıdi. Qalǵan 7 jylda shamamen 160 myń teńge tóleıdi. Nátıjesinde artyq tólem 8 mln teńgeden 10 mln teńge aralyǵynda bolady.

Bektenovtyń aıtýynsha, osylaı, «Otbasy bankiniń» qoldanystaǵy jınaq júıesi qaryz alýshyǵa qarjylyq júktemeni aıtarlyqtaı tómendetýge múmkindik beredi.

«Otbasy bankke» qatysty saýal

Aıta keteıik, depýtat Islam Suńqar premer-mınıstr Oljas Bektenovke «Otbasy bankke» qatysty depýtattyq saýal joldaǵan.

Depýtat Islam Suńqar «Otbasy bankinde» ıpoteka alǵan azamattar qarjy uıymynda sol somanyń jartysyn jınaıtynyn aıtady. Keıinirek bank klıentke qalǵan bóligin beredi. Bul rette turǵyn úıdiń barlyq qunyna paıyz júredi. Demek, adamnyń óz qarajaty esebinen de, berilgen somaǵa da esepteledi.

«Mysaly, klıent 10 mıllıon ákelse, bank oǵan 10 mıllıon beredi. Al syıaqy mólsherlemesi 20 mıllıon teńgege esepteledi. Adamǵa óz aqshasyn paıyzben berý jáne bul úshin qosymsha bank komısıasyn alý qanshalyq ádiletti? Salymshylardyń narazylyǵyna bank bul aqsha depozıtte jatyr, oǵan paıyzdyq mólsherleme jáne memleket syılyqaqysy da bar degen jaýap beredi. Biraq bul jaı ǵana qarjylyq aıla dep esepteımiz. Óıtkeni depozıt mólsherlemesi – nebári 2 paıyz. Memleket syılyqaqysy shekteýli somaǵa, ıaǵnı 200 AEK beriledi», – dep túsindirdi Islam Suńqar.

«Otbasy bank» kirisi – 107,5 mlrd teńge

2023 jyldyń qorytyndysy boıynsha «Otbasy banki» barlyq bank arasynda eń kóp kiris – 107,5 mlrd teńge alǵanyn atap ótti.

«Ekinshi suraq týyndaıdy: aqshany kim tabady, halyq pa álde bank pe? Osynyń negizinde turǵyn úı qunynyń barlyq somasyna banktik syıaqy esepteýdi qaıta qaraýdy usynamyz», – dep túıindedi sózin Islam Suńqar.

Bul maqala týraly ne oılaısyz?