28 naýryzda keshkisin Aqtóbe qalasynda tótenshe jaǵdaı jarıalandy.
Aqtóbe qalasynyń ákimi Azamat Bekettiń málimdemesi ákimdiktiń resmı saıtynda jarıalandy.
"Sý tasqyny - tabıǵı qubylys. Ony tejeý ońaı bolmaı jatqany ras. Aqtóbe sý qoımasynda bolǵan sýdyń kólemi bir táýliktiń ishinde 150 mıllıon tekshe metrge kóbeıdi. Sý qoımasy mundaı kólemdi sýdy syıǵyza almaıdy. Iaǵnı, qalaǵa túgel qaýip tónip tur. Sondyqtan, biz sýdy jiberip otyrýǵa májbúrmiz. Elek ózeniniń boıynda ornalasqan jáne Qarǵaly ózeniniń Kirpishti kópirine jaqyn ornalasqan baý-baqsha ujymdarynyń turǵyndaryn evakýasıaǵa kelisim berip, úılerińizdi bosatýlaryńyzdy suraımyn.
Biz úshin sizderdiń ómirlerińiz óte mańyzdy. Ózderińiz bilesizder naýryzdyń 26-sy kúni qala aýmaǵynda kúnniń kúrt jylynýyna baılanysty dala sýlary kóterildi. Birneshe turǵyn alaptar men baý-baqsha ujymdaryna qaýip tóndi. Búgingi kúni 73 úıge sý kirdi. 155 adam evakýasıalandy. Sý tasqyny saldarynan zardap shekken turǵyndarǵa kómek beriledi. Eshkim nazardan tys qalmaıdy. Taǵy da aıtarym, sizderdiń ómirlerińiz biz úshin mańyzdy! Sý tasqynymen kúreske kómektesip júrgen turǵyndarǵa rahmet. Osy qıyn jaǵdaıda sizderdi birlikke shaqyramyn", - delingen ákimniń jazbasynda.
